پەريزات قايراتتىڭ ىسىنەن «اسار ۇمە» قايىرىمدىلىق قورى زارداپ شەككەن، دەپ حابارلايدى Dalanews.kz.
بۇل تۋرالى قوردىڭ رەسمي پاراقشاسىندا حابارلاندى.
"وو «Biz Birgemiz Qazaqstan 2030» باسشىسىنىڭ قارجى جىمقىرۋ ءىسى قوعامدا كەڭىنەن بەلگىلى بولدى.
ءبىز سەنگىمىز كەلمەيتىن فاكتىلەر شىندىققا اينالىپ، بۇل جاعداي ەلدەگى قايىرىمدىلىق سالاسىنا ۇلكەن سوققى بولدى. بۇل وقيعا يگى ىستەرمەن اينالىساتىن ءار ادامعا اسەرىن تيگىزىپ، قايىرىمدىلىققا دەگەن سەنىمگە كۇمان ۇيالاتتى.
وكىنىشكە قاراي، وو «Biz Birgemiz Qazaqstan 2030» جاساعان الاياقتىق ارەكەتتەر ءبىزدىڭ قورىمىزعا دا اسەر ەتتى. تەرگەۋ ناتيجەسىندە وف «اسار ۇمە» رەسمي تۇردە جابىرلەنۋشى تاراپ دەپ تانىلدى.
ءىستىڭ ءمان-جايىن تولىق جاريالاي المايمىز، ءبىراق ادىلدىك ورنايتىنى ءسوزسىز – كىنالىلەر زاڭ الدىندا جاۋاپ بەرەدى"، دەلىنگەن جازبادا.
ەسكە سالايىق، پەريزات قايرات كوكتەمگى سۋ تاسقىنىنان زارداپ شەككەن ازاماتتارعا كومەكتەسۋ ءۇشىن جينالعان 1،5 ملرد تەڭگەدەن استام قاراجاتتى جىمقىردى دەگەن كۇدىككە ىلىنگەن بولاتىن. مالىمەتكە سۇيەنسەك، قايىرىمدىلىقتىڭ نەگىزگى بولىگى قىمبات ءسان بۇيىمدارى مەن جىلجىمايتىن مۇلىكتى ساتىپ الۋ ماقساتىنا جۇمسالعان.
«بيىل كوكتەمدە ول ەلورداداعى اۆتوسالونداردا 88 ملن تەڭگەگە «Mercedes-Benz S450»، 80 ملن تەڭگەگە «Lexus LX-600» جانە 39 ملن تەڭگەگە «Haval» اۆتوكولىكتەرىن ساتىپ الدى. وسى كەزەڭدە ول جالپى سوماسى 600 ملن تەڭگەنى قۇرايتىن ەلوردانىڭ پرەميۋم ساناتتاعى «Akbulak Riviera»، «Highvill Ishim Gold»، «كوك جايلاۋ» تك (تۇراق ورىندارىن قوسا العاندا)، سونداي-اق «Vela Village» كوتتەدج قالاشىعىندا جىلجىمايتىن مۇلىك نىساندارىن ساتىپ الدى.
سونىمەن قاتار، قازاقستاندىقتاردىڭ قايىرىمدىلىققا جىبەرگەن قاراجات ەسەبىنەن پەريزات ق. دۋباي، دوحا، لوندون جانە ستامبۋلداعى «St. Regis»، «Shangri-La»، «Palazzo Versace» جانە «Kempinski» سياقتى بەس جۇلدىزدى قوناق ۇيلەردە دەمالعان. بۇل ەلدەردە ول «Cartier» جانە «Louis Vuitton» سياقتى برەندتەردىڭ قىمبات اكسەسسۋارلارى مەن زەرگەرلىك بۇيىمداردى ساتىپ الىپ، فەشەنەبەلدى مەيرامحانالارعا بارىپ، ياحتالاردى جالداعان. قىلمىستىق سحەمانى جۇزەگە اسىرۋ ءۇشىن دوستارى مەن تۋىستارىنا 8% سىياقى بەرىپ، قوردىڭ اقشاسى قولما-قول اقشاعا اينالدىرىپ وتىرعان.
وسىلايشا، پەريزات قايرات ءوزىنىڭ زاڭسىز ارەكەتتەرىمەن ەرىكتىلەر قوزعالىسىنىڭ بەدەلىنە نۇقسان كەلتىرىپ، ونىڭ اشىقتىق پەن ادالدىق پرينسيپتەرىنە كۇمان كەلتىردى جانە حالىقتىڭ سەنىپ تاپسىرعان قاراجاتىن تالان-تاراجعا سالعان"، - دەپ جازىلعان قما مالىمەتىندە.
ارتىنشا قما ونىڭ زاڭسىز ارەكەتىنىڭ تاعى ءبىر ەپيزودى انىقتالعانىن حابارلادى.
"2023 جىلدىڭ قاراشا ايىندا پەريزات قايرات پالەستينا تۇرعىندارىنا گۋمانيتارلىق كومەك كورسەتۋ ءۇشىن قاراجات جيناۋدى ۇيىمداستىردى. 2023 جىلعى جەلتوقساندا وسى اقشا ەسەبىنەن پەريزات ق. «Sensata Plaza» ەليتالىق كەشەنىنەن 49 ملن تەڭگەگە ءۇش بولمەلى پاتەر جانە 30 ملن تەڭگەگە «Mercedes-Benz EQE 500 4 Matic» جاڭا اۆتوكولىگىن ساتىپ الدى. سونىمەن قاتار، قاراجاتتىڭ ءبىر بولىگى باا-دە «Rolex»، «Prada» جانە «Fendi» برەندتىك بۋتيكتەرىنەن زەرگەرلىك بۇيىمداردى، ساعاتتار مەن كيىمدەردى ساتىپ الۋعا جۇمسالدى"، - دەپ جازىلعان حابارلامادا.
