سىبايلاس جەمقورلىققا قارسى قىزمەت بۇرىن ق ر بعم "ۇلتتىق تەستىلەۋ ورتالىعى" رمقك ديرەكتورىنىڭ بۇرىنعى ورىنباسارى د.س. جاقسىبەكوۆكە قاتىستى سىبايلاس جەمقورلىق قىلمىس جاسادى دەگەن كۇدىكپەن سوتقا دەيىنگى تەرگەۋ جۇرگىزدى، دەپ حابارلايدى Dalanews.kz سىبايلاس جەمقورلىققا قارسى قىزمەتكە سىلتەمە جاساپ.
جاقسىبەكوۆ "ProBusineSS.kz" ج ش س ديرەكتورى س.ا. پانكەيەۆتەن قۇنى 8،8 ملن. تەڭگە بولاتىن "Toyota camry" ماركالى اۆتوكولىگىن پارا رەتىندە الدى دەپ كۇدىكتەنگەن، ايماقتاردا اتالعان ءجشس-نىڭ ۇبت وتكىزۋ كەزىندە قىزمەت كورسەتۋ بويىنشا مۇددەسىن قورعاعانى ءۇشىن.
اعىمداعى جىلدىڭ 9 جەلتوقسانىندا نۇر-سۇلتان قالاسىنىڭ بايقوڭىر اۋداندىق №2 سوتىنىڭ ۇكىمىمەن جاقسىبەكوۆ پارا الدى دەپ تانىلىپ، وعان 7 جىلعا باس بوستاندىعىنان ايىرۋ جازاسى تاعايىندالدى.
اتالعان ادام مەملەكەتتىك قىزمەتتە قىزمەت اتقارۋ قۇقىعىنان ءومىر بويىنا ايىرىلدى.
ۇكىم زاڭدى كۇشىنە ەنگەن جوق.
