«تاسساي» يندۋستريالدى ايماعىندا ورنالاسقان قۇرىلىس جوباسىنىڭ بارىسىمەن وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ ارنايى تانىسىپ،  اتقارىلىپ جاتقان جۇمىستارعا وڭ باعاسىن بەردى.

 «الداعى جىلى زاۋىت ىسكە قوسىلسا، 220 ادامدى جۇمىسپەن قامتۋعا مۇمكىندىك تۋادى. بۇل وتە جاقسى دۇنيە. ەڭ باستىسى – قازىرگى تاڭدا كاسىپورىندا اتقارىلىپ جاتقان جۇمىستارعا وڭ باعا بەرۋگە بولادى. سوندىقتان جۇمىستى جوسپارلى تۇردە جۇرگىزىپ، زاۋىتتى ەرتەرەك ىسكە قوسۋعا ءمان بەرگەن ءجون»،- دەدى ج. تۇيمەبايەۆ.   

ايتا كەتەيىك، كاسىپورىن كاسىپكەرلىكتى قولداۋ كارتاسىنىڭ اياسىندا جۇزەگە اسىرىلۋدا. ال جوبا قۇنى 17،5 ملرد. تەڭگەنى قۇرايدى. زاۋىت جىلىنا  120 ترانسفورماتور شىعارۋعا قاۋقارلى.

زاۋىت ونىمدەرى قازاقستان مەن تمد ەلدەرىنىڭ سۇراناسىن  قاناعاتتاندىرادى دەپ كۇتىلۋدە.  «وندىرىلەتىن ءونىم شەتەلدىك كاسىپورىندارعا شىنايى باسەكەلەستىككە توتەپ بەرە الادى»،- دەيدى ماماندار. سونىمەن قاتار «Asia Trafo» ج ش س ءوز ونىمدەرىنىڭ 50 پايىزىن تمد ەلدەرىنە ەكسپورتتاۋدى جوسپارلاپ وتىر. زاۋىتتا «High volt»، «Knutch» (گەرمانيا)، «Tuboly astronic»، «Mika fluit» (شۆەيساريا)، «Hikon» (حورۆاتيا) جانە باسقا (تۇركيا، جۇڭگو) فيرمالارىنىڭ جابدىقتارىن قولداناتىن بولادى.

وقو اكىمىنىڭ باسپا ءسوز قىزمەتى