پرەزيدەنت تاپسىرماسى بويىنشا بالقاشتاعى مەديسينالىق مەكەمەلەردى سالۋعا جانە جاڭعىرتۋعا 7،5 ملرد تەڭگە باعىتتالدى، دەپ حابارلايدى Dalanews.kz.
قاراعاندى وبلىسىنداعى ءبىرقاتار مەديسينالىق نىساندى جۇزەگە اسىرۋعا ارناۋلى مەملەكەتتىك قوردان شامامەن 7،5 ملرد تەڭگە ءبولىندى.
اتاپ ايتقاندا، قاراعاندىداعى جاڭا ونكولوگيالىق ورتالىقتىڭ وپەراسيالىق-رەانيماسيالىق بلوگىن زاماناۋي جابدىقتارمەن جاراقتاندىرۋعا 6،2 ملرد تەڭگە ءبولىندى. وبلىستىق بيۋدجەتتەن قوسىمشا 1،74 ملرد تەڭگە كولەمىندە بىرلەسىپ قارجىلاندىرۋ كوزدەلگەن. قازىرگى ۋاقىتتا نىساننىڭ دايىندىعى 70%-عا جەتتى، ىشكى ارلەۋ جۇمىستارى جۇرگىزىلۋدە.
بالقاش قالاسىندا قازىرگى ۋاقىتتا كۇردەلى جوندەۋ جۇرگىزىلىپ جاتقان كوپبەيىندى اۋرۋحانا بازاسىندا اۋدانارالىق مەديسينالىق حاب قۇرىلادى. بۇل ماقساتتارعا 1 ملرد تەڭگەدەن استام قارجى ءبولىندى، جالپى قۇنى 1،27 ملرد تەڭگەنى قۇرايدى. جوبا اياسىندا انگيوگرافيالىق وپەراسيالىق جانە قابىلداۋ-دياگنوستيكالىق بولىمشەلەردى ورنالاستىرۋ ءۇشىن قوسىمشا كورپۋستىڭ قۇرىلىسى اياقتالۋدا. بۇگىنگى تاڭدا نىسان 96%-عا دايىن. سونداي-اق قاڭقانى سالۋ، ينجەنەرلىك جەلىلەردى توسەۋ جانە ىشكى ارلەۋ بويىنشا نەگىزگى جۇمىستار اياقتالدى. نىساندى وسى جىلدىڭ سوڭىنا دەيىن تاپسىرۋ جوسپارلانعان.
سونىمەن قاتار بالقاشتا بالالاردى وڭالتۋ ورتالىعى قۇرىلۋدا: بۇرىنعى ساناتوريي عيماراتىن قايتا جابدىقتاۋ ءۇشىن 272،1 ملن تەڭگە باعىتتالدى. جوبا ستاسيونار جانە امبۋلاتوريالىق قابىلداۋدى ۇيىمداستىرۋدى كوزدەيدى. رەابيليتولوگتاردى، نيەۆروپاتولوگتاردى، لوگوپەدتەردى جانە ەدش نۇسقاۋشىلارىن قوسا العاندا، تار بەيىندى مامانداردان تۇراتىن كوپسالالى كوماندا قۇرىلادى. بۇل بالالارعا وبلىس ورتالىعىنا بارماي-اق ساپالى وڭالتۋعا قول جەتكىزۋدى قامتاماسىز ەتەدى. جۇمىستاردى اياقتاۋ 2026 جىلدىڭ اقپان ايىنا جوسپارلانۋدا.
وسى جوبالاردى جۇزەگە اسىرۋ وڭىردەگى مەديسينالىق كومەكتىڭ ساپاسىن ارتتىرادى. وسىلايشا، انگيوگرافيالىق وپەراسيالىق بولىمشەنى ىسكە قوسۋ «التىن ساعات» قاعيداسى نەگىزىندە جانە پاسيەنتتەردىڭ ءومىرىن ساقتاي وتىرىپ، بالقاش تۇرعىندارىنا ينفاركت پەن ينسۋلت كەزىندە شۇعىل جوعارى تەحنولوگيالىق كومەك كورسەتۋگە مۇمكىندىك بەرەدى. وڭالتۋ ورتالىعىنىڭ اشىلۋى تۇرعىلىقتى جەرى بويىنشا ەرەكشە قاجەتتىلىكتەرى بار بالالار ءۇشىن قالپىنا كەلتىرۋ ەمىن ۇزدىكسىز الۋدى قامتاماسىز ەتەدى.
