كرەمل پۋتين مەن ترامپتىڭ تەلەفون ارقىلى سويلەسكەنىن جوققا شىعاردى، - دەپ حابارلايدى Dalanews.kz Nege.kz-كە سىلتەپ.
كرەمل مالىمەتىنشە، پۋتين مەن ترامپتىڭ تەلەفون ارقىلى سويلەسىپ، ۋكرايناداعى سوعىستى تالقىلاعانى تۋرالى اقپارات «ويدان قۇراستىرىلعان».
«ەشقانداي اڭگىمەلەسۋ بولعان جوق. ءتىپتى، بەدەلدى باسىلىمداردا جاريالاناتىن اقپاراتتىڭ ساپاسى وسىنداي. بۇل شىندىققا جاناسپايتىن جالعان اقپارات»، - دەدى پەسكوۆ.
جۋرناليستەر كرەملدىڭ باسپا ءسوز حاتشىسىنان: «رەسەي پرەزيدەنتى اقش-تىڭ جاڭا سايلانعان پرەزيدەنتىمەن جاقىن ارادا قانداي دا ءبىر بايلانىس ورناتۋدى جوسپارلاپ وتىر ما؟»، - دەپ سۇرادى. پەسكوۆ ازىرگە ناقتى جوسپار جوق ەكەنىن جەتكىزدى.
ەسكە سالايىق، بۇعان دەيىن رەسەي فەدەراسياسىنىڭ پرەزيدەنتى ۆلاديمير پۋتين دونالد ترامپتىڭ پرەزيدەنت سايلاۋىندا جەڭىسكە جەتۋىنە قاتىستى پىكىر بىلدىرگەن بولاتىن.
پۋتين ترامپ ەرجۇرەك ەكەنىن، وعان جاسالعان شابۋىل كەزىندە ءوزىن ۇستاۋى ناعىز باتىلدىق ەكەنىن اتاپ وتكەن. ۆلاديمير ءپۋتيننىڭ سوزىنشە، سايلاۋ كەزىندە ترامپقا جان-جاقتان قىسىم جاسالعان.
"ول وڭعا نە سولعا بۇرىلۋعا، ارتىق ءسوز ايتۋعا قورقاتىن جاعدايعا جەتتى. ءوزىن ەرەكشە جاعدايلارعا كورسەتە ءبىلدى. وسى ءساتتى پايدالانىپ، ترامپتى جەڭىسكە جەتۋىمەن قۇتتىتاعىم كەلەدى"، - دەيدى پۋتين "ۆالداي" پلەنارلىق وتىرىسىندا.
پۋتين ترامپقا تەلەفون شالىپ قۇتتىقتاۋىن ۇيات سانامايتىنىن، ءبىراق ازىرگە حابارلاسۋ جوسپارىندا جوعىن ايتتى.
