پرەمەر-مينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين قازاقستاندا نەسيەنى كوپ الاتىن ازاماتتاردىڭ تابىسى جاقسى دەپ سانايدى. بۇل تۋرالى ول ءماجىلىس دالىزىندە جۋرناليستەرگە بەرگەن جاۋابىندا ايتتى، دەپ حابارلايدى Dalanews.kz.

جۋرناليستەر تۇرعىنداردىڭ كوپشىلىگى نەسيەگە تاۋەلدى بولىپ، ءتىپتى دارى-دارمەككە دەيىن ءبولىپ تولەۋ ارقىلى الۋعا ءماجبۇر ەكەنىن العا تارتتى. ال جۇمانعارين بۇل پىكىرمەن كەلىسپەيتىنىن ءبىلدىرىپ، نەسيەنى "اقىلمەن الاتىنداردىڭ" تابىسى جوعارى ەكەنىن ايتتى.

"جالپى نەسيە الاتىن ادام اقىلدى ادام دەپ سانايمىن. ەگەر ادام كوپ نەسيە الىپ جاتسا، دەمەك ونى تولەيتىندەي جاقسى تابىس تابادى دەگەن ءسوز. ال ەندى دارى-دارمەكتى ءبولىپ تولەۋگە الۋعا قاتىستى ايتسام، مۇنداي جاعداي ويلانۋعا تۇرارلىق. قازاقستاندا كەپىلدەندىرىلگەن تەگىن مەديسينالىق كومەك شەڭبەرىندە 12 ميلليون ادام دارى-دارمەكتى تەگىن الادى. ولاردى Kaspi Red ارقىلى نەسيەگە الۋدىڭ قاجەتى جوق قوي. دارىگەرگە بارىپ، رەسەپت الىپ، تەگىن الۋعا بولادى. بالكىم، اڭگىمە باسقا، وتە سيرەك كەزدەسەتىن نەمەسە بىزدە تەگىن بەرىلمەيتىن دارىلەر تۋرالى شىعار. ءبىراق بۇل دا الەۋمەتتىك سالاعا قاتىستى ماسەلە، ونى دا قاراستىرىپ جاتىرمىز"، – دەدى سەرىك جۇمانعارين.

ءمينيستردىڭ ايتۋىنشا، مىندەتتى الەۋمەتتىك مەديسينالىق ساقتاندىرۋ جۇيەسىنە قاتىسۋشى قازاقستاندىقتار كوپتەگەن ءدارىنى تەگىن الۋعا قۇقىلى.

"ءبىرىنشى دارىگەرگە بارۋ كەرەك، ءدارى تەگىن بەرىلە مە، بەرىلمەي مە، انىقتاپ العان ءجون. ەگەر راسىمەن قاجەت ءدارى تەگىن بەرىلمەسە، باسقا شەشىمىن ىزدەۋگە بولادى. ءبىراق نەسيە العاندا اركىم ءوزى جاقسىلاپ ويلانۋعا ءتيىس"، – دەدى ول.