جانسەيىت تۇيمەبايەۆ «Phoenix Global» كومپانياسىنىڭ وكىلىمەن كەزدەستى

Dalanews 10 قاز. 2017 15:16 451

وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ «Phoenix Global» كومپانياسىنىڭ تمد جانە ورتا ازيا ەلدەرى بويىنشا ايماقتىق ديرەكتورى اشيل كاۋل باستاعان دەلەگاسيامەن كەزدەستى. كەزدەسۋ بارىسىندا تاراپتار اۋىل شارۋاشالىعى سالاسىن دامىتۋ باعىتىندا اڭگىمە ءوربىتتى.

كەزدەسۋدە ءسوز العان اشيل كاۋل مىرزا ءوڭىر باسشىسىنا كومپانيانىڭ اۋىل شارۋاشىلىعىن دامىتۋ باعىتىنداعى اتقارىپ وتىرعان جۇمىستارىن بايانداپ بەردى.

– ءبىزدىڭ كومپانيا الداعى ۋاقىتتا جەمىس-جيدەك جانە كوكونىس كلاستەرىن دامىتۋعا ەرەكشە ءمان بەرىپ وتىر. وسى رەتتە وڭتۇستىك قازاقستان وبلىسىنىڭ اۋىل شارۋاشىلىعى سالاسىنداعى پوتەنسيالى قىزىقتىرۋدا. ءبىزدىڭ كومپانيا 2016 جىلدان بەرى اۋىل شارۋاشىلىعى سالاسىندا ەلەۋلى ەڭبەك ەتىپ، ءونىمدى ساقتاۋ ءارى العاشقى وڭدەۋدەن وتكىزۋ ىسىمەن اينالىسىپ كەلەدى. قازاقستاندا 42 مىڭ 204 گەكتارعا جۋىق جەرىمىز بار. وندا نەگىزىنەن بيداي، ارپا ەگىلىپ، جەم-شوپ ازىقتارىن دايىنداۋ سالاسىنا باسىمدىق بەرىلىپ وتىر، – دەدى «Phoenix Global» كومپانياسىنىڭ اۋماقتىق ديرەكتورى اشيل كاۋل مىرزا.



اتالعان كومپانيانىڭ الەمدىك اۋىل شارۋاشىلىعىن دامىتۋدا دا قوسىپ وتىرعان ۇلەسى وراسان. تەك قانا بيداي ەگۋ عانا ەمەس، كۇرىش ءوسىرۋ، وسىمدىك مايىن ءوندىرۋ ىسىمەن دە اينالىسادى. سونداي-اق فەرمەرلىك شارۋاشىلىقتى دامىتىپ، باۋ-باقشا، گۇل ءوسىرۋ ىسىندە دە جەتكەن جەتىستىكتەرى از ەمەس ەكەن.

كومپانيانىڭ مۇمكىندىكتەرىنە قانىققان ءوڭىر باسشىسى قوناقتارعا وبلىسىمىزداعى اۋىل شارۋاشىلىعى سالاسىنداعى جەتەكشى سەكتورلاردى اڭگىمەلەپ بەردى. سونداي-اق الداعى ۋاقىتتا ىنتىماقتاستىق نەگىزدە بىرلەسە جۇمىس ىستەۋگە ءازىر ەكەنىن جەتكىزدى.

– وڭتۇستىك قازاقستان وبلىسى – اگرارلى ءوڭىر. وڭىردە سۋارمالى ەگىستىك كولەمى 466 مىڭ گەكتارعا جۋىقتايدى. وسى رەتتە سىزدەردىڭ كومپانيالارىڭىزدىڭ الەۋەتى كوڭىل قۋانتىپ وتىر. الداعى ۋاقىتتا وبلىس اكىمدىگى مەن كومپانيا ىنتىماقتاستىقتى ارتتىرىپ، بىرلەسكەن ينۆەستيسيالىق جوبالاردى جۇزەگە اسىرۋعا بولاتىنىنا سەنىم مول، – دەدى جانسەيىت قانسەيىت ۇلى.

كەزدەسۋ سوڭىندا تاراپتار ەستەلىككە سۋرەتكە ءتۇسىپ، سىي-سياپات الماستى.

وقو اكىمىنىڭ باسپا ءسوز قىزمەتى

ۇسىنىلعان
سوڭعى جاڭالىقتار