وبلىسىمىزدا جەر قويناۋىن زاڭسىز پايدالانۋعا جول بەرىلمەۋى كەرەك. وسى رەتتە زاڭسىزدىقتاردى قاداعالاۋعا ءتيىستى جەرگىلىكتى پوليسيا قىزمەتىنىڭ جۇمىسىن شيراتۋدى تاپسىرامىن. بۇگىن بۇل تۋرالى سەلەكتورلىق ماجىلىستە وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ ءمالىم ەتتى. 



«جەر قويناۋىن زاڭسىز پايدالانۋدى توقتاتۋ جانە كەلىسىم شارت بويىنشا جۇرگىزىلىپ جاتقان جۇمىستاردىڭ بارىسى تۋرالى» وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى يلياس قۇرامىسوۆ بايانداما جاسادى. باسقارما باسشىسىنىڭ ايتۋىنشا، سوڭعى جىلدارى سايرام اۋدانى ارقىلى وتەتىن  «اق سۋ»، «سايرام سۋ» وزەندەرىنىڭ جاعالاۋلارىندا زاڭسىز جەر قويناۋىن پايدالانۋلانۋ فاكتىلەرى ءجيى تىركەلىپ وتىر.

– ءبىرىنشى كەزەكتە سايرام اۋدانى اقسۋ وزەنى بويىنداعى 12 كاسىپورىنعا تەكسەرۋ تاعايىندالىپ، جەر ۋچاسكەلەرىنىڭ نىسانالى ماقساتقا ساي پايدالانباعانى انىقتالدى. ودان بولەك، تۇراقتى تۇردە رەيدتىك شارالار ۇيىمداستىرۋ كەزىندە بيىل 15 دەرەك فاكتىنى انىقتادىق. جالپى، ىشكى ىستەر ورگاندارىندا اعىمداعى جىلى جەر قويناۋىن زاڭسىز ءوندىرۋ بويىنشا  80 دەرەك تىركەلدى. ونىڭ ىشىندە   41- ءىس وندىرىستەن قىسقارتىلسا، 4 - ءىس وندىرىستە، 32 - ءىس اكىمشىلىك شارا كورۋ ءۇشىن وبلىستىق ەكولوگيا دەپارتامەنتىنە جولدانعان.  ەكولوگيا دەپارتامەنتى تاراپىنان 20 زاڭدى جانە جەكە تۇلعاعا – 2،7 ملن تەڭگە ايىپپۇل سالىندى. ونىڭ وندىرىلگەنى 1،93 ملن تەڭگەنى قۇرايدى، – دەدى  يلياس قۇرامىسوۆ.

2017 جىلدىڭ ءساۋىر ايىنان باستاپ سايرام اۋدانىندا 12 نىسان  تەكسەرىلىپ، زاڭ بۇزۋشىلىقتاردى جويۋ جونىندە بەرىلگەن نۇسقامالاردىڭ 3 ايلىق مەرزىمى وتكەنىمەن، بۇگىنگى كۇنگە كاسىپورىندارعا ناقتى شارالار قابىلدانباعان. ءبىر قىزىعى، بۇگىنگە دەيىن وبلىس بويىنشا بىردە-بىر زاڭسىز جەر قويناۋىن پايدالانۋشى قىلمىستىق جاۋاپكەرشىلىككە تارتىلماپتى. سەبەبى،  كەلتىرىلگەن زارداپ 1000 ايلىق ەسەپتىك كورسەتكىشتەن اسپاسا، اكىمشىلىك جاۋاپكەرشىلىك  شەگىندە قاراستىرىلادى.

– وبلىستا 166 زاڭدى جەر قويناۋىن پايدالانۋشىلارعا كەلىسىم شارت بەرىلگەن بولاتىن.  سولاردىڭ تەك 65-عانا جەر ۋچاسكەلەرى كارەر رەتىندە راسىمدەلگەن، ال قالعان 101 جەر ۋچاسكەسى اۋىل شارۋاشىلىعى ماقساتىنداعى جەرلەر ەسەبىندە تۇر. جەر قويناۋىن پايدالانۋشىلار تاراپىنان جەر ۋچاسكەسىن پايدالانۋ زاڭدىلىعىن جانە جەر ۋچاسكەلەرىنىڭ قۇقىق بەرۋ قۇجاتتارىنىڭ زاڭدىلىعىنا باستى نازار اۋدارىپ، تەكسەرۋ جۇمىستارى جۇرگىزىلسىن، – دەدى جانسەيىت قانسەيىت ۇلى.

ءوڭىر باسشىسى جەر قويناۋىن زاڭسىز پايدالانۋ فاكتىلەرىن الدىن-الۋ نەمەسە جويۋ جۇمىستارىن باسەڭدەتكەنى ءۇشىن سالاعا جاۋاپتى قىزمەتكەرلەرگە قاتاڭ تارتىپتىك شارا كورۋدى تاپسىردى. وسى رەتتە اۋىل وكرۋگتەرىنىڭ اكىمدەرى مەن ۋچاسكەلىك پوليسيانىڭ قىزمەتىنە سايكەستىگى تەكسەرىلەتىن بولدى.

وقو اكىمىنىڭ باسپا ءسوز قىزمەتى

 

https://dalanews.kz/30447