ەكسپو-2017 حالىقارالىق مامانداندىرىلعان كورمەسى داعدارىسقا قارسى شارا رەتىندە ەلىمىزگە ۇلكەن مۋلتيپليكاتيۆتىك پايدا اكەلىپ جاتىر. بۇل تۋرالى «استانا ەكسپو-2017» ۇك» اق باسقارما ءتوراعاسى احمەتجان ەسىموۆ ايتتى.

«اكىمدىكتەن سانداردى سۇراتتىم، ستاتيستيكا ورگاندارىنان دا اقپارات الدىق. مىسالى، استانا بويىنشا ءبىز ەكونوميكانىڭ بارلىق سالاسىندا ەكونوميكالىق قىزمەتتىڭ ەداۋىر جاندانعانىن كورىپ وتىرمىز. تۇرعىن ۇيلەردى پايدالانۋعا بەرۋ 33%-عا، تاۋار اينالىمى 20%-عا، ساۋدا ويىن-ساۋىق ورتالىقتارىنا كەلگەن ادامدار 2 ەسە ۇلعايعان. تۋريزم سالاسىندا دا ايتارلىقتاي وزگەرىس بار، تۋروپەراتورلارعا جۇگىنگەندەر سانى 78%-عا وسكەن. ءبىز «اشىق اسپان» جۇيەسىن ەنگىزدىك، رەيستەر 1،3 ەسە ارتتى. حەلسينكي، بۋداپەشت، ۆارشاۆا سياقتى قالالاردا جاڭا رەيستەر اشىلدى. كۇن سايىن استاناعا جەتى مىڭ ادام اۋە رەيىسىمەن، 16 مىڭ ادام جولاۋشىلار كولىگىمەن كەلەدى، بۇل وتە جاقسى كورسەتكىش»، - دەدى احمەتجان ەسىموۆ. ونىڭ ايتۋىنشا، ماۋسىمنىڭ وزىندە ەلوردا بيۋدجەتىنە قىزمەتتەر سالاسىنان تۇسكەن سالىق 2،5 ەسە ۇلعايعان. استانادا سونداي-اق شاعىن جانە ورتا بيزنەس سۋبەكتىلەرى كوبەيىپتى. «ءبىز جولدىڭ ۇشتەن ەكى بولىگىن ءجۇرىپ وتتىك. ءقازىردىڭ وزىندە پرەزيدەنتتىڭ كورمەنى وتكىزۋ تۋرالى شەشىمى قانشالىقتى كورەگەندى بولعانىن كورىپ وتىرمىز. بۇل داعدارىسقا قارسى شارا بولىپ شىقتى جانە ەلىمىزگە ۇلكەن مۋلتيپليكاتيۆتىك پايدا اكەلىپ جاتىر. كورمە ارقىلى جەتكەن جەتىستىكتەرىمىزدى بارلىق قازاقستاندىق ماقتان تۇتۋى ءتيىس دەگەن ويدامىن»، - دەپ اتاپ ءوتتى احمەتجان ەسىموۆ. ونىڭ سوزىنە قاراعاندا، كورمە كەزىندە ەكسپو پاۆيلوندارى مەن نىساندارىندا بولعاندار سانى 15 ملن ادامنان استى. «كورمە تاقىرىبى وتە ۇلكەن قىزىعۋشىلىق تۋدىردى، كۇن سايىن بىزدە ۇلتتىق كۇندەر ءوتىپ جاتقانىن كورىپ جۇرسىزدەر. 115 ەل مەن 22 حالىقارالىق ۇيىم وسى سالاداعى ءوز تەحنولوگيالارىن كورسەتۋگە تىرىسۋدا، ول كەلۋشىلەردىڭ ۇلكەن قىزىعۋشىلىعىن تۋدىرۋدا، سوندىقتان كورمەنىڭ اياقتالۋىنا 37 كۇن قالعاندا جوسپارداعى كورسەتكىشتەرگە جەتىپ ۇلگەردىك. ال حالىقارالىق پاۆيلوندار مەن ەكسپو نىساندارىندا بولعاندار سانى 15 ملن-نان اسىپ كەتتى»، – دەپ تۇيىندەدى «استانا ەكسپو-2017» ۇك» اق باسقارما ءتوراعاسى.