قۇرىلتاي دەپۋتاتى لەززات قوجاحمەتوۆا بالانى بالاباقشا كەزەگٸنە قويۋ اتا-انالارعا قيىندىق تۋعىزاتىنىن ايتتى. ول وقۋ-اعارتۋ مينيسترٸ جۇلدىز سٷلەيمەنوۆاعا دەپۋتاتتىق ساۋال جولدادى, دەپ حابارلايدى dalanews.kz.
دەپۋتاتتىڭ پٸكٸرٸنشە, بٷگٸندە بالاباقشاعا كەزەك مەسەلەسٸ كٶپتەگەن اتا-انا ٷشٸن ٶزەكتٸ. ەسٸرەسە, استانا, الماتى, شىمكەنت سيياقتى ٸرٸ قالالاردا مەكتەپكە دەيٸنگٸ ۇيىمدارعا سۇرانىس جوعارى.
"قازٸر بالانى مەكتەپكە دەيٸنگٸ ۇيىمعا تٸركەۋدٸڭ ەكٸ جولى بار: ورىن بولسا, بالا بٸردەن بالاباقشاعا قابىلدانادى, ورىن بولماسا, كەزەككە قويىلادى. الايدا كٷتۋ تٸزٸمٸنە تۇرۋ ٷشٸن اتا-انا بالانى الدىمەن باسقا بالاباقشاعا تٸركەۋگە تيٸس. سالدارىنان مەملەكەتتٸك بالاباقشادان ورىن كٷتكەن اتا-انا بالاسىن كٶبٸنە جەكەمەنشٸك مەكەمەگە تٸركەۋگە مەجبٷر. نەتيجەسٸندە بالا بٸر بالاباقشادا تٸركەلگەنٸمەن, ٸس جٷزٸندە باسقا بالاباقشادان ورىن كٷتەدٸ", - دەدٸ ول.
لەززات قوجاحمەتوۆانىڭ ايتۋىنشا, جەكەمەنشٸك بالاباقشالار بالانى قابىلداماي, تەك قۇجات جٷزٸندە تٸركەپ قويادى, ال اتا-انالار مەملەكەتتٸك بالاباقشادان ورىن الۋ مٷمكٸندٸگٸن ساقتاپ قالۋ ٷشٸن مۇنداي شارتقا كەلٸسۋگە مەجبٷر.
وسىعان بايلانىستى دەپۋتات اتا-انا بالاسىن باسقا بالاباقشاعا تٸركەمەي-اق, ٶزٸ تاڭداعان ۇيىمنىڭ كٷتۋ پاراعىنا تٸكەلەي قويۋى كەرەك ەكەنٸن, ال بوس ورىن پايدا بولعان كەزدە بالا اشىق ەرٸ تٷسٸنٸكتٸ كەزەكپەن قابىلدانۋعا تيٸس ەكەنٸن ايتتى.
