استانادا كوپقاباتتى ءۇيدىڭ شاتىرىنا شىعىپ العان جىگىت قۇتقارىلدى، دەپ حابارلايدى Dalanews.kz.
20 ءساۋىردا پوليسياعا كوپقاباتتى تۇرعىن ءۇيدىڭ شاتىرىندا ەر ادام جۇرگەنى تۋرالى حابار تۇسكەن. ول 18 جاستاعى ەلوردا تۇرعىنى ەكەنى انىقتالدى.
الدىن الا مالىمەتكە سايكەس ول بيىكتەن سەكىرۋگە نيەتتەنگەن.
وقيعا ورنىنا جەدەل قىزمەتتەر مەن پسيحولوگتار تارتىلىپ، قايعىلى جاعدايدىڭ الدىن الۋ ءۇشىن بارلىق شارا قابىلدانعان. پوليسيا قىزمەتكەرلەرى اۋماقتى قورشاۋعا الىپ، تومەنگى جاققا ارنايى ۇرلەمەلى قۇتقارۋ جاستىعىن ورنالاستىرعان.
جەدەل ارەكەت ناتيجەسىندە جىگىت شاتىردان ءتۇسىرىلدى، ءقازىر ونىڭ ومىرىنە ءقاۋىپ جوق.
