اقتاۋ قالالىق اكىمدىگى مەملەكەتتىك ساتىپ الۋ پورتالىندا ءار داناسى 4،6 ميلليون تەڭگە تۇراتىن قوقىس كونتەينەرلەرىن ساتىپ الۋعا ارنالعان لوت جاريالادى، دەپ حابارلايدى Dalanews.kz Ulysmedia.kz-كە سىلتەپ.

Lada.kz مالىمەتىنشە، «اقتاۋ قالالىق تكش ءبولىمى» مم ءۇشىن تۇرمىستىق قاتتى قالدىقتاردى (تقق) جەر استىندا جيناۋ جانە ساقتاۋ ءۇشىن گيدراۆليكالىق جۇيەنى ساتىپ الۋ جانە ورناتۋ» اتتى لوت 28 اقپاندا تالقىلاۋعا شىعارىلدى. كونكۋرسقا قاتىسۋعا الدىن الا ءوتىنىم 5-13 ناۋرىز ارالىعىندا قابىلدانادى.

بيلىك بۇل جوباعا قوسىمشا قۇن سالىعىن ەسەپتەمەگەندە 891 428 570 تەڭگە ءبولۋدى جوسپارلاپ وتىر. قۇجاتتامادا ءبىر كونتەينەردىڭ باعاسى 4 642 857 تەڭگە دەپ كورسەتىلگەن. شامامەن 192 كونتەينەر ساتىپ الۋ جوسپارلانىپ وتىر.

قۇجاتقا سايكەس كونتەينەرلەردىڭ ىشكى كولەمى كەمىندە 1،1 تەكشە مەتر (1100 ليتر) بولۋى ءتيىس. ولشەمدەرى – 3560ح1800ح2700 مم. كورپۋس ءتيپى – ىستىقتاي يلەكتەلگەن بولاتتان جاسالعان دانەكەرلەنگەن قۇرىلىم. ساقتاۋ باكتارى – دانەكەرلەنگەن، توت باسپايتىن بولات، – دەلىنگەن تەحنيكالىق سيپاتتامادا.

- 192 كونتەينەر ورناتۋ ءۇشىن قاجەت ماتەريالداردى ساتىپ الۋ جانە ءار جۇيەگە 3 ەۆروكونتەينەردەن ورنالاستىرۋ كىرەدى (جالپى سانى – 576 دانا)، – دەلىنگەن قۇجاتتاردا.

قالالىق تكش ءبولىمىنىڭ مالىمەتىنشە، كونتەينەرلەردى ورناتاتىن ناقتى ورىندار ءالى بەلگىلەنبەگەن.

- كونتەينەرلەر حالىق كوپ جينالاتىن ورىندار نەمەسە كوپقاباتتى تۇرعىن ۇيلەردىڭ جانىنا ورناتىلۋى مۇمكىن. كوبىنەسە قوقىس ۋاقىتىندا شىعارىلماي، كونتەينەرلەر لىق تولىپ، قالدىقتار جان-جاققا شاشىلىپ جاتادى. سوندىقتان سانيتارلىق تالاپتاردى ساقتاۋ جانە قالانىڭ ەستەتيكالىق كورىنىسىن جاقسارتۋ ماقساتىندا مۇنداي كونتەينەرلەردى تۇرعىن ۇيلەردىڭ جانىندا ورناتۋدى جوسپارلاپ وتىرمىز، – دەپ مالىمدەدى ءبولىم وكىلدەرى.

قۇجاتقا سايكەس، كونتەينەردىڭ كەپىلدىك مەرزىمى 36 اي بولۋى ءتيىس.