الماتى پروكۋراتۋراسىنىڭ نۇسقاۋىمەن ءال-فارابي اتىنداعى قازاق ۇلتتىق ۋنيۆەرسيتەتىنە قاتىستى دەربەس دەرەكتەردى تاراتۋ بويىنشا سوتالدى تەرگەپ-تەكسەرۋ باستالدى، - دەپ حابارلايدى Dalanews.kz.
الماتى قالاسىنىڭ پروكۋراتۋراسى مالىمەتىنشە، 14 اقپاندا بوستاندىق اۋدانىنىڭ پوليسيا باسقارماسى ءال-فارابي اتىنداعى قازۇۋ ستۋدەنتتەرىنىڭ مەديسينالىق قۇپياسى تۋرالى جەكە دەرەكتەر مەن مالىمەتتەردى تاراتۋ دەرەگى بويىنشا قازاقستان رەسپۋبليكاسىنىڭ قىلمىستىق كودەكسى 147-بابى بويىنشا سوتقا دەيىنگى تەرگەپ-تەكسەرۋدى تىركەگەن. قازىرگى ۋاقىتتا قىلمىستىق ءىس اياسىندا قاجەت تەرگەۋ ارەكەتتەرى جۇرگىزىلىپ جاتىر.
بۇعان دەيىن عىلىم جانە جوعارى ءبىلىم ءمينيسترى ساياسات نۇربەك وسى وقيعاعا قاتىستى پىكىر ءبىلدىردى. ويتكەنى WhatsApp جەلىسىندە وسى ۋنيۆەرسيتەتتىڭ ستۋدەنت قىزدارىنىڭ اتى-جوندەرىمەن بىرگە جسن، ۇيالى نومىرلەرى جانە مەديسينالىق مالىمەتتەرى تاراپ كەتكەن بولاتىن. مۇندا قىزداردىڭ كەيبىر جەكە اقپاراتتارى دا كورسەتىلگەن.
"بۇل - تىكەلەي زاڭبۇزۋشىلىق. سوندىقتان ماسەلە باقىلاۋعا الىندى. كىنالىلەر قولدانىستاعى زاڭناما اياسىندا جازالانادى. جەكە دەرەكتەردى قورعاۋ تۋرالى زاڭ بار. بۇل اكىمشىلىك قۇقىق بۇزۋشىلىق تۋرالى ماسەلە بولىپ وتىر"، - دەدى ساياسات نۇربەك كۋلۋاردا.
