الماتىدا بەلگىلى جۋرناليست، پروفەسسور كاكەن حامزين كيبەرالاياقتاردىڭ قۇرىعىنا ءتۇسىپ، باسىنداعى جالعىز پاتەرىنەن ايىرىلىپ قالدى. ءقازىر پوليسيا ءىس قوزعاپ، سوتقا دەيىنگى تەرگەۋ امالدارىن جۇرگىزىپ جاتىر. زيالى قاۋىم وكىلى بۇل تۋرالى ءوزىنىڭ الەۋمەتتىك جەلىدەگى پاراقشاسىندا كوپشىلىككە ەگجەي-تەگجەيلى بايانداپ بەردى، دەپ حابارلايدى Dalanews.kz.
وقيعا بيىل 12 ماۋسىمدا باستالعان. پروفەسسوردىڭ ايتۋىنشا، سول كۇنى تاڭەرتەڭ وزدەرىن "قالالىق ەنەرگوجۇيەسى" مەكەمەسىنىڭ قىزمەتكەرلەرىمىز دەپ تانىستىرعان بەلگىسىز ادامدار حابارلاسقان.
"ولار ماعان ۇيدەگى ەلەكتر ەسەپتەگىشىنىڭ ەسكىرگەنىن،ونى شۇعىل تۇردە اۋىستىرۋ كەرەكتىگىن ايتتى. تەلەفوندا "قالالىق ەنەرگوجۇيەسىنىڭ" لوگوتيپى تۇردى. سولارعا سەنىپ، ەش كۇدىكتەنبەي، جەكە مالىمەتتەرىمدى بەرىپ قويدىم"، – دەپ جازادى پروفەسسور Facebook-تەگى پاراقشاسىندا.
وسىدان سوڭ پروفەسسورعا ىلە-شالا ءوزىن "قارجى باقىلاۋ دەپارتامەنتىنىڭ قىزمەتكەرىمىن" دەپ تانىستىرعان باسقا ءبىر ادام تەلەفون شالعان. ول پروفەسسوردىڭ eGov پورتالىنداعى بارلىق جەكە دەرەكتەرى الاياقتاردىڭ قولىنا ءتۇسىپ قالعانىن ايتىپ، "بۇل قۇپيا وپەراسيا، ەشكىمگە ءتىس جارماڭىز، ايتپەسە جاۋاپقا تارتىلاسىز" دەپ قاتاڭ ەسكەرتكەن.
"وسىدان كەيىن ءوز كابينەتىنەن ءوزىن "ۇقك مايورى مالتييەۆ" دەپ تانىستىرعان ءۇشىنشى ادام ۆيدەو ارقىلى بايلانىسقا شىقتى. بارلىعىن ءوز باقىلاۋىندا ۇستايتىنىن ايتىپ، مەنى الاياقتاردى ۇستاۋعا كومەكتەسۋگە مىندەتتى ەكەنىمدى نىعىرلاپ ايتتى"، – دەيدى كاكەن حامزين.
سول كۇننەن باستاپ پروفەسسور بەلگىسىز ءۇش ادامنىڭ جەتەگىندە كەتىپ، بىرنەشە ميلليون تەڭگەسىنەن ايىرىلعان. العاشىندا الاياقتار ونىڭ اتىنا 4 ميلليون تەڭگە كولەمىندە كرەديت راسىمدەلگەنىن ايتىپ، وسى سومانى تەز ارادا تەرمينال ارقىلى "ۇلتتىق بانك ەسەبىنە" جىبەرۋىن تالاپ ەتكەن.
"ولاردىڭ كورسەتكەن مەكەنجايلارى بويىنشا بارىپ، بىرنەشە تەرمينال ارقىلى اقشانى اۋدارىپ جىبەردىم. ءبىراز ۋاقىت وتكەن سوڭ اقشانىڭ "ۇلتتىق بانك ەسەبىنە" تۇسكەنى تۋرالى قۇجات جىبەردى. سەنىپ قالدىم"، – دەيدى پروفەسسور.
وسىدان كەيىن قاسكويلەر پروفەسسوردىڭ حالىق بانكىندەگى شوتىندا جاتقان 5 ميلليون تەڭگەسىن "الاياقتار قولىنا تۇسپەسىن" دەگەن جەلەۋمەن قولما-قول شەشىپ الىپ، كۋرەرگە تاپسىرۋعا كوندىرگەن.
"كەزدەسۋ الماتىداعى اۋەزوۆ پەن اباي كوشەلەرىنىڭ قيىلىسىنداعى بانك بولىمشەسىنىڭ الدىندا ءوتتى. ءتىپتى، كۋرەردىڭ سۋرەتىن دە ءتۇسىرىپ الدىم. ار جاعىمدا ءبىر كۇدىك بولدى ما، بىلمەيمىن. ءبىراق كوپ ۇزاماي اقشانىڭ تاعى دا "ۇلتتىق بانك ەسەبىنە" تۇسكەنى تۋرالى حابارلاما كەلىپ، سەنىمىم نىعايا ءتۇستى"، – دەيدى جابىرلەنۋشى.
مۇنىمەن الاياقتار توقتاماعان. ولار "جەكە دەرەكتەرىڭىزدى تولىق جاڭارتۋ ءۇشىن" دەگەن سىلتاۋمەن پروفەسسورعا ءوز پاتەرىن ساتقىزۋعا دەيىن بارعان.
"ءۇيىڭىزدى نوتاريۋس ارقىلى نارىق باعاسىنان تومەن باعامەن ساتىڭىز، بۇل - ۋاقىتشا شارا، اقشاڭىز "ۇلتتىق بانك ەسەبىنە" تۇسەدى دەپ سەندىردى. ەسىمدى جيسام، جارتى اي بويى سولاردىڭ ايتقانىنا ەرىپ جۇرە بەرىپپىن. ءسويتىپ، 26 ماۋسىم كۇنى ءۇيىمدى 31 ميلليون تەڭگەگە ساتتىم"، – دەيدى پروفەسسور.
پاتەر ساتىلعان سوڭ، اقشانى تاعى دا كەشكى ۋاقىتتا كۋرەر ارقىلى "ارنايى ەسەپشوتقا" اۋدارىپ جىبەرگەن. وسى كەزدە عانا الاياقتار ونىڭ eGov پورتالىنداعى جەكە دەرەكتەرى "جاڭارتىلىپ جاتىر" دەپ سەندىرىپ باققان.
پروفەسسور الاياقتاردىڭ ارباۋىنا ءتۇسىپ قالعانىن تەك 4 شىلدە كۇنى عانا تۇسىنگەن. سول كۇنى ءۇيدى ساتىپ العان وتباسى پوليسيامەن بىرگە كەلىپ، پاتەردى بوساتۋدى تالاپ ەتكەندە، الاياقتاردىڭ وزدەرى وعان "ءسىز الاياقتارعا جەم بولدىڭىز، ەندى ءبىز سىزگە كومەكتەسە المايمىز، قىزىڭىز بەن نەمەرەلەرىڭىزدى ويلاڭىز" دەپ ايتقان.
"ەسىمنەن تانىپ قالا جازدادىم. قىزدارىم شەتەلدە جۇرگەن ەدى، شاكىرتتەرىم دەرەۋ كومەككە كەلدى. پاتەر ساتىپ العان وتباسىعا ۋاقىتشا تۇراتىن باسپانا تاۋىپ بەرىپ، وزدەرى قارجى جيناپ كومەكتەستى. ءقازىر ءۇيىم ارەستتە تۇر، پوليسيا ءىستى تەرگەپ جاتىر"، – دەيدى پروفەسسور.
كاكەن ءحامزيننىڭ سوزىنشە، ءقازىر ونىڭ وتباسىنا تاعى 26 ميلليون تەڭگەدەن استام قاراجات كەرەك. بۇل اقشانى 25 تامىزعا دەيىن پاتەر ساتىپ العان وتباسىعا قايتارۋى ءتيىس. سول ءۇشىن ول كوپشىلىكتەن قولداۋ سۇراپ، الەۋمەتتىك جەلى ارقىلى ۇندەۋ تاستادى.
"مەن مۇنى سىزدەرگە ساباق بولسىن دەگەن نيەتپەن جازدىم. الاياقتاردىڭ قۇرىعىنا ىلىنگەن تەك مەن عانا ەمەس. ەڭبەگى سىڭگەن ارحيتەكتوردىڭ دا ءدال وسىنداي جاعدايعا تاپ بولعانىن ەستىدىم. كوپتەگەن ادام گيپنوزدىڭ اسەرىمەن ۇلكەن سومادا نەسيە راسىمدەپ، اقشاسىنان ايىرىلىپ جاتىر. ساق بولىڭىزدار، الدانباڭىزدار"، دەگەن ول كوپشىلىككە ەسكەرتۋ جاسايدى.
قازىرگى ۋاقىتتا پروفەسسوردىڭ شاكىرتتەرى مەن تۋىستارى حالىقتان جاردەم سۇراپ، قاراجات جيناپ جاتىر. پوليسيا ءىستى تەرگەۋدە.
كومەك قولىن سوزامىن دەگەندەر ءۇشىن رەكۆيزيتتەر:
Kaspi، Halyk: +7 775 650 58 09 (اسەل ق.)
