ءماجىلىس دەپۋتاتى باقىتجان بازاربەك قۇرىلىس سالاسىنا قاتىستى قۇرىلىس كودەكسى زاڭ جوباسىنىڭ تانىستىرىلىمىندا بۇل ىسكە جاۋاپتى ورگانداردى اشىق سىنادى، - دەپ حابارلايدى Dalanews.kz.

دەپۋتاتتىڭ سوزىنشە، كودەكستە ەشقانداي جاڭالىق جوق.

"تيمۋر جيەنبايەۆيچكە وسى ۋاقىتقا دەيىن سىندى ايتىپ كەلدىم. الدىمىزدا قۇرىلىس كودەكسى. بۇل 177 بەت، 34 ءبولىم، 200 باپتان تۇرادى. مينيسترلىكتىڭ قوسقانى 3-4 ءبولىم عانا. قالعاندارى ساۋلەت، قالا قۇرىلىسى تۋرالى زاڭ، جەكە تۇرعىن ءۇي قۇرىلىسى تۋرالى زاڭ جانە ۇلەستىك قاتىسۋ. بۇل زاڭ جوباسىندا ەشقانداي جاڭالىق جوق. باسقاشا ايتقاندا، ءۇش زاڭدى قوسىپ-قوسىپ، ءبىر زاڭ رەتىندە كىرگىزە سالعان. "كۇشەيتتىك" دەيدى. ..."جاڭا زاڭ" دەيدى. ەشقانداي جاڭا زاڭ جوق"، - دەدى دەپۋتات.

سونىمەن قاتار، دەپۋتات الماتىدا كوشكىندە قازا تاپقان وتباسىن ەسكە الىپ، بۇل ماسەلەگە قاتىستى دا ەشقانداي وزگەرىس جوعىن اشىق ايتتى. ونىڭ سوزىنشە، بۇل جەرلەر قوعامدىق ورىنعا جاتادى. باقىتجان بازاربەك تۇپتەپ كەلگەندە 2000-جىلدارى قۇرىلىس سالۋشىلاردىڭ مۇددەسىن قورعاعان زاڭ سول كۇيىندە قالعانىن ايتتى. 

"قۇرىلىس كودەكسى جاڭا دەپ بوس ۇمىتكە سەنبەڭىزدەر! بۇل جەردە جاڭا ەشتەڭە دە جوق. ...مىنا كودەكستى 10-سىنىپتىڭ وقۋشىسى جازا الادى. 1-كۋرستىڭ ستۋدەنتىن ايتپاعاندا. بۇل - رەفەرات، كۋرستىق جۇمىس. ونى بىزگە قۇرىلىس كودەكسى رەتىندە اكەلىپ وتىر. بۇل - بار بولعانى 200 بەتتىك اق قاعاز. ...ستيليستيكالىق، گرامماتيكالىق، ورفوگرافيالىق قاتەلەردى ايتپاي-اق قويايىن. 3-كۋرستىڭ ستۋدەنتى مۇنداي قاتە جىبەرمەيدى"، - دەيدى ول.