"Қазақмыс корпорациясы" ЖШС төрағасы Жезқазған қаласында болған оқиғаға байланысты үндеу жариялады, деп хабарлайды Dalanews.kz.
Ол 24 қаңтарда жарияланды.
Бүгін біз "Кәсіп Қорған" кәсіподақ ұйымының төрағасы Тоғызбай Тәжбеновпен қоштастық. Тоғызбай Абсаматұлының қайтыс болғаны туралы қайғылы хабарды қатты қайғыра отырып, қабыл алдық.
"Қазақмыс корпорациясы" ЖШС бірінші басшысы ретінде компания бұл қайғылы жағдайдың себептерін анықтауға бар күш-жігерін салады деп толықтай айта аламын. Қазіргі уақытта құқық қорғау органдары қажетті шараларды қабылдауда, содан кейін оқиғаның барлық мән-жайлары анықталады.
Осы қайғылы оқиғаның төңірегінде қазіргі уақытта түрлі пікірлер айтылып жатыр. Мен бұл лауазымға Тоғызбай Тәжбеновті адал, парасатты және жоғары кәсіби қасиеттері үшін ұсынғанымды атап өткім келеді.
Сол себепті де мерзімінен бұрын қорытынды жасаудан бас тартып, тергеу нәтижелерін күту керек деп санаймын.
Мен орны толмас қайғыға байланысты Тоғызбай Абсаматұлының туыстары мен жақындарына шын жүректен қайғы мен қайғы-қасіреттеріне ортақтасып, көңіл айтамын.
21 қаңтарда "Кәсіпқорған" кәсіподағының төрағасы Тоғызбай Тәжбенов қызметтік кеңседе өзара сөзге келген "Қазақмыс корпорациясы" ЖШС бас директоры Амангелді Мініғұловты төбелес кезінде пышақпен жарақаттады.
Сондай-ақ, екеуіне ара түспек болған корпорацияның қызметкері Сабыржан Тембаев та кеуде тұсынан пышақ жарақатын алды. Осы жайттардан соң кәсіподақ қызметкері өз-өзіне қол жұмсады делінді. Бірақ оны өлтіру фактісі де тексеріліп жатыр.
Дәрігерлер жарақаттанған екеуге ота жасалғанын хабарлаған.
Бұл оқиғаға не себеп болуы мүмкін екендігіне қатысты Салалық жұмысшылар кәсіподағының төрағасы Мұрат Машкенов өз болжамымен бөліскен.
Машкенов пышаққа түскен Мініғұловты танымайтынын баса атап өткен. Бірақ өз-өзіне қол жұмсаған Тәжбеновпен бірге ол жұмыс барысымен жақсы таныс екен.
- Ол сабырлы адам болатын, дегенмен әділетсіздікке келгенде ешнәрсеге төзбейтін, бірден көтеріліп шығатын, меніңше, біздегі әр екінші адам "осындай" шығар, - деді Машкенов.
Шын мәнінде, салалық кәсіподақ құрамына кіретін ұжымдарда ішкі жанжал, наразылыққа келетін болсақ, ол бөлек әңгіме.
- Ондай бізде үнемі болып тұрады: ұйым үлкен, республикалық мәртебеге ие, шамамен 60 мың адам жұмыс істейді. Әр ұжымда жалақыға, еңбек жағдайлары бойынша түрлі шағым мен талаптар болады ғой. Ол осы мәселелердің бәрімен бетпе-бет келіп жүрген адам. Шамасы, осындай кезде қандай да бір шиеленіс ушыққан болуы мүмкін.
Тәжбенов ұжымдық органдардың келісімінсіз өз бетінше көбіне шешім қабылдай бастады соңғы кездері.
Егер ұжымдық органдар деңгейінде осы мәселелер қаралса, жұмыс берушімен үстел басында мәселені шешуге болар еді, онда бұл жанжал болмас па еді. (...) Қандай да бір қақтығыс болды ғой, бір-бірін жақтырмай қалды ма немесе басқа нәрсе болды ма екен. Үстел басына отырып, келіссөз жүргізудің орнына, міне осындай ыңғайсыз жағдай орын алды, соңы төбелеске, қол жұмсауға ұласқан, - деді ол.
