Алматы іргесінде Ахметжан Есімовтің экс-көмекшісіне тиесілі жерлер мемлекетке қайтарылды, деп хабарлайды Dalanews.kz.
Генерал-майор, отставкадағы әскери және Алматы әкімі Ахметжан Есімовтің бұрынғы көмекшісі Павел Новиков Алматының тауға жақын аймағынан ірі жер телімдеріне иелік еткен.
Бұл учаскелерді ол өзіне қарасты «Халықаралық клубтар қауымдастығы» ЖШС арқылы иеленген. Енді сот шешімімен бұл жерлер мемлекеттік меншікке қайтарылды.
Әңгіме 2004 жылы 25 миллион теңгеге жекеменшікке рәсімделген 840 гектар жер туралы болып отыр. Алайда прокуратура аталған учаскелер су қорына жататынын және олардың жекешелендірілуі заңсыз жүргізілгенін анықтады.
Бүгінде бұл жерлердің нарықтық құны – 54 миллиард теңге.
Аталған аумақтың бір бөлігі (шамамен 100 гектар) алма мен алмұрт өсіруге пайдаланылған, ал қалған бөлігі бос жатқан.
Компания бұл істі бірнеше мәрте даулауға және тіпті Қазақстан президенті Қасым-Жомарт Тоқаевқа жүгінуге тырысқанымен, сот прокуратураның талабын қолдады.
