Aqtóbe oblysynda meditsinalyq mekemelerdiń qurylysyna 1,4 mlrd teńge bólindi, - dep habarlaidy Dalanews.kz.
Úkimettiń baspasóz qyzmeti málimetinshe, Memleket basshysynyń tapsyrmasyna sáikes elimizde zańsyz iemdenilgen aktivter esebinen áleýmettik mańyzy bar nysandar salý jobalary júzege asyrylyp jatyr.
Aqtóbe oblysynda meditsinalyq mekemelerdiń qurylysyna Arnaýly memlekettik qordan shamamen 1,4 mlrd teńge bólingen. Qarajat 11 nysannyń, iaǵni meditsinalyq jáne feldsherlik-akýsherlik pýnktter, dárigerlik ambýlatoriialar qurylysyna baǵyttaldy.
2025 jyly Aqtóbe oblysynyń myna aýdandarynda feldsherlik-akýsherlik pýnktter:
- Yrǵyz aýdany, Nura aýyly
- Baiǵanin aýdany, Noǵaity aýylynda salynady.
Sondai-aq, meditsinalyq pýnktter:
- Shalqar aýdany, Shoqysý aýyly,
- Shalqar aýdany, Sarysai aýyly,
- Muǵaljar aýdany, Jaryq aýyly,
- Shalqar aýdany, Toǵyz aýyly,
- Qobda aýdany, Begaly aýyly,
- Yrǵyz aýdany, Jarma aýylynda salynady.
Dárigerlik ambýlatoriialar:
- Muǵaljar aýdany, Qaiyńdy aýyly,
- Muǵaljar aýdany Muǵaljar aýyly,
- Alǵa aýdany, Marjanbulaq aýylynda salynbaq.
"Meditsinalyq mekemelerdiń barlyǵy táýligine 25-45 kelýshige qyzmet kórsetýge eseptelgen", - dep jazylǵan habarlamada.
