Jańa oqý jylynda Aqtóbe óńirinde 5 630 oqýshyǵa shaqtalǵan jeti jańa mektep paidalanýǵa beriledi. Onyń tórteýi «Keleshek mektepteri» ulttyq jobasy aiasynda boi kótergen, dep habarlaidy dalanews.kz.
Aqtóbe qalasynda «Keleshek mektepteri» ulttyq jobasy boiynsha salynǵan jańa mektepter Altyn Orda yqsham aýdany jáne Ońtústik-Batys-2 turǵyn alabynda ashylady. Sondai-aq Temir aýdanyndaǵy Keńqiiaq pen Shubarqudyq eldi mekenderinde taǵy eki mektep oqýshylardy qabyldaidy.
Biylǵy oqý jylynda balalardy qabyldaýǵa daiyn mektepterdiń biri – Altyn Orda shaǵyn aýdanyndaǵy №81 jalpy bilim beretin mektep. 900 oqýshyǵa arnalǵan bilim ordasy 1 qyrkúiekte alǵashqy shákirtterine esik ashady.
Jańa oqý jyly qarsańynda mektepte Ashyq esik kúni ótti. Is-shara barysynda ata-analar men bolashaq oqýshylar oqý kabinetterin, zerthanalar men mekteptegi basqa da nysandardy aralap, olardyń múmkindikterimen tanysty.
Bilim ordasynda STEM jáne robototehnika, informatika, himiia, biologiia, fizika, geografiia, tilder men matematika kabinetteri jabdyqtalǵan. Sonymen qatar sheberhanalar, kitaphana, akt zaly, horeografiia jáne sport zaldary qarastyrylǵan.
Mektep ǵimaratynyń jalpy aýmaǵy 13 299 sharshy metr. Qaýipsizdikti qamtamasyz etý maqsatynda 101 tsifrlyq beinebaqylaý kamerasy ornatylǵan. Onyń 78-i ǵimarattyń ishinde, 23-i mektep aýmaǵynda ornalasqan. Munda 250 oqýshy mektep tabaldyryǵyn alǵash ret attamaq.
Ulttyq joba aiasynda boi kótergen taǵy bir bilim ordasy – Ońtústik-Batys-2 turǵyn alabyndaǵy №87 jalpy bilim beretin mektep. 300 oqýshyǵa shaqtalǵan mektepke jańa oqý jylynda №10 mektepten aýysý tártibimen 290 oqýshy qabyldanady.
Mektepte oqýshylarǵa zamanaýi bilim alýǵa qajetti jaǵdai jasalǵan. Munda STEM, robototehnika, biologiia, himiia, fizika jáne informatika kabinetteri, sondai-aq bastaýysh synyptar, tehnologiia, tarih, geografiia, matematika jáne alǵashqy áskeri daiyndyq pánderine arnalǵan oqý kabinetteri bar.
Ashyq esik kúni barysynda ata-analar men oqýshylar mekteptiń infraqurylymy jáne materialdyq-tehnikalyq bazasymen tanysty.
«Keleshek mektepteri» ulttyq jobasy aiasynda salynǵan tórt mektepten bólek, jańa oqý jylyna deiin oblysta taǵy úsh jalpy bilim beretin mektep halyq igiligine beriledi. Jańa bilim oshaqtarynyń iske qosylýy oqýshy oryndarynyń sanyn arttyryp, halyq sany ósip kele jatqan eldi mekender men turǵyn alaptarda zamanaýi bilim berý infraqurylymynyń qoljetimdiligin qamtamasyz etýge múmkindik beredi.
Jalpy, «Keleshek mektepteri» ulttyq jobasy aiasynda Aqtóbe oblysynda 2023–2026 jyldary jalpy syiymdylyǵy 11 400 oryndyq 14 mekteptiń qurylysy aiaqtaldy.
