Sońǵy jyldary Qazaqstanda zań ústemdigin nyǵaitýǵa, qoǵamdyq tártipti qamtamasyz etýge erekshe kóńil bólinip keledi. Aitysker aqyn Ásem Erejeqyzy áleýmettik jelidegi paraqshasynda «Zań jáne tártip» ideologiiasymen qatar mádeniet pen jaýapkershilik máselesin qolǵa alý keregin aitty, dep habarlaidy dalanews.kz.
Aqynnyń aitýynsha, ótkendi aityp ókine bermei, jaqsy úmitpen alǵa umtylatyn ýaqyt keldi. Ol qoǵamda oń ózgeristerdiń bar ekenin atap ótti.
«Saralap, saraptap qarasam, ainalada jaqsy ózgeris kóp. Ishtei riza bolyp qoiamyn, qudai bul kúndi de kórsetti. Sizderdi qaidam, maǵan memleketimizdiń saiasaty qoǵamdyq tártip máselesin qatty qolǵa alǵany seziledi. Tártip máselesine Prezident te jii aityp júr. Bul maǵan unaidy», – dep jazdy ol.
Ásem Erejeqyzy búginde elde kóptegen múmkindik bar ekenin, alaida mádeniet pen tártip máselesine kóbirek kóńil bólý qajet ekenin aitty.
«Qazir bizde bári bar. Toi-dýmandy sál rettep, ysyrapshyldyqtan arylsaq, qarajat máselesi de retteledi dep oilaimyn. Jetispei júrgen nárse – mádeniet pen tártip. Áitpese qazaq óte dana, zerek halyq qoi. Qazir bizdiń jastardyń arasynda tórt tilde erkin sóileitinder kóp. Jastar óte talantty. Qýanasyń. Tek tárbieni durys berýimiz kerek», – dedi aqyn.
Ol ál-Farabidiń «Balaǵa eń áýeli tárbie berý kerek. Tárbiesiz berilgen bilim – adamzattyń qas jaýy» degen sózin mysalǵa keltirip, qoǵamdaǵy kóptegen máselelerdiń tárbieden bastalatynyn atap ótti.
Aqynnyń pikirinshe, adamnyń kóshede qoqys tastamaýy, qoǵamdyq orynda aiqailamaýy nemese úlkenge qurmet kórsetýi úshin mindetti túrde baqylaý men jazadan qorqý qajet emes.
«Munyń bári – mádeniet pen tárbieden bastalady. Sondyqtan búgin Qazaqstanǵa "Zań jáne tártip" ideologiiasymen qatar "Mádeniet jáne jaýapkershilik" ideologiiasy da qajet», – dedi ol.
Sondai-aq Ásem Erejeqyzy bala tárbiesinde qoǵamdyq mádenietke erekshe mán berý kerektigin aitty. Onyń sózinshe, balaǵa kishkentaiynan qoǵamdyq oryndy taza ustaýdy, kezek saqtaýdy, qart adamǵa jol berýdi, ózgeniń tynyshtyǵyn syilaýdy, memlekettik múlikke janashyrlyqpen qaraýdy jáne ózgeniń quqyǵyn qurmetteýdi úiretý mańyzdy.
«Bul – usaq-túiek emes. Ulttyń mádeni deńgeii osyndai kúndelikti áreketterden kórinedi. Elimiz damyp, Otanymyz kórkeie bersin!» – dep túiindedi aqyn.
