Álemge áigili sýdaǵy «F1H2O» saiysy aldaǵy 5 jyl boiy Qapshaǵai sý qoimasynda ótýi múmkin. Halyqaralyq saiystyń uiymdastyrýshylary arnaiy Almaty oblysyna kelip, óńir basshysy Marat Sultanǵazievpen kezdesti. Jiynda álemdik F1H2O uiymy, iHolding kompaniiasy jáne Saýd Arabiiasynan kelgen resmi delegatsiia ókilderi men Almaty oblysynyń ákimi 2027 jylǵy álem chempionatyn Qonaev qalasynda ótkizý týraly kelisimge qol qoidy, dep habarlaidy dalanews.kz.
Qazaqstan – bul álem chempionatyn qabyldaityn altynshy memleket. Jarysqa shetelden keminde 5 myń qonaq keledi dep kútilýde. Jergilikti turǵyndar men týristerdi qosqanda olardyń sany tipten artady. Sondai-aq sý betindegi sheberlik pen jyldamdyqty jaqsy kóretin 1 milliardqa jýyq kórermen jarysty tikelei efirden tamashalaidy dep kútilýde.
«Saýd Arabiiasy sport salasynda álemdegi eń úzdik jobalardy iske asyryp keledi. Bul belsendi demalysty damytyp, salaýatty ómir saltyn saqtaýǵa septigin tigizedi. Jyl saiyn Qapshaǵai sý qoimasynda «Tengri ultra» marafony men «Oceanman» ashyq sýda júzý jarysy ótkiziledi. Odan bólek respýblikalyq deńgeidegi túrli saiystar uiymdastyrylady. Mundai halyqaralyq sharalar týrizmdi damytyp, óńirdiń órkendeýine jol ashady. Sondyqtan biz bul jobany birlesip iske asyrýǵa daiynbyz», – dedi Marat Eleýsizuly.
KSA ProMediaPortal jáne F1H2O uiymdarynyń ókili ári basqarma tóraǵasy Iasser Áli Ál-Iami qazirgi tańda chempionatqa 11 memleket qatysatynyn aitty. Bul talaby joǵary kúrdeli jarys bolǵandyqtan, munda arnaiy daiyndyqtan ótken komandalar ǵana baq synai alady. Chempionat barysynda kórermenniń qaýipsizdigi tolyq qamtamasyz etiledi. VIP-aimaqtar, jarysty basqarý ortalyǵy, komandalardyń daiyndyǵyna arnalǵan aýmaq jáne media ortalyq qarastyrylady. Sondai-aq otbasylyq demalysqa arnalǵan oryndar da qurylady. Onda elimizdiń mádenieti tanystyrylyp, ulttyq taǵamdar men kádesyilar usynylady. Sport saiysynan bólek túrli merekelik is-sharalar jankúierler kóńilin kóteredi. Jarystyń jabylý saltanatynda aýqymdy gala-kontsert ótkizilip, onda álemge tanymal juldyzdar óner kórsetedi.
«Búginde Saýd Arabiiasy men Qazaqstan arasynda berik yntymaqtastyq ornaǵan. Biz Almaty oblysynyń damý kórsetkishterin zerttep, onyń bolashaǵy zor ekenin kórdik. Aldaǵy ýaqytta bul aimaq halyqaralyq biznes ortalyǵyna ainalady dep senemiz», – dedi basqarma tóraǵasy Iasser Áli Ál-Iami.
Demek, aldaǵy 5 jylda Almaty oblysyna álemniń túkpir-túkpirinen sportsúier jankúier aǵylyp, Qonaev týrister tolassyz keletin ortalyqqa ainalady. Chempionat elimizdi dúniejúzine tanytyp, onyń kórkem tabiǵaty men múmkindikterin álemge áigileidi. Óńirge investitsiia tartýǵa, infraqurylymyn jaqsartýǵa jáne ekonomikany ilgeriletýge de zor yqpal etedi.
