Atyraý oblysynyń Jangeldin aýylynda joǵalǵan otbasyǵa qatysty áleýmettik jelide "óz betinshe tergeý júrgizip", olardy hakerlik tehnologiialar arqyly tabýǵa ýáde bergen qazaqstandyqtyń isi sotqa joldandy, dep habarlaidy dalanews.kz.
Ishki ister ministrliginiń málimetinshe, er adam otbasy joǵalǵan kezde áleýmettik jelide keńinen tanylǵan. Ol ózin táýelsiz «haker» retinde tanystyryp, Instagram arqyly joǵalǵan adamdardy geolokatsiia, SIM-karta jáne bank operatsiialary boiynsha baqylap otyrǵanyn málimdegen.
Alaida IIM onyń eshqandai qupiia derekqorǵa qol jetkize almaǵanyn habarlady.
"Atalǵan tulǵaǵa qatysty alaiaqtyqtyń birneshe epizody boiynsha tergeý aiaqtaldy, is sotqa joldandy. Onyń eshqandai derekke qoljetimdiligi bolǵan joq. Ol paidalanǵannyń bári – bizdiń qyzmettik aqparat. Al derekterdiń taralýyna qatysty kináli laýazymdy tulǵalar qatań jaýapkershilikke tartyldy", – dedi Ishki ister ministriniń orynbasary Sanjar Ádilov.
Tergeý nusqasyna sáikes, kúdikti tek Jangeldindegi oqiǵaǵa bailanysty belsendilik tanytyp qana qoimai, 2024 jyldyń qyrkúiek-jeltoqsan ailary aralyǵynda Instagram arqyly Atyraý oblysynyń eki turǵynyn aldap, olardan 3 million teńgeden astam aqsha iemdengen.
Osydan keiin er adam shetelge ketip, halyqaralyq izdeýge jariialanǵan.
2025 jyldyń maýsym aiynda ol Interpol jelisi arqyly Túrkiianyń Samsýn qalasynda ustaldy. Keiin Qazaqstanǵa ekstraditsiialandy.
Qazir oǵan qatysty alaiaqtyq faktileri boiynsha tergeý aiaqtalyp, is sotqa berilgen. Endi aiyptalýshyǵa qatysty sońǵy sheshimdi sot shyǵarady.
