Alaqandai aýyldyń berekesin ketirip, qazaq pen uiǵyrdyń arasyna ot sala jazdaǵan janjalǵa WhatsApp-taǵy statýs sebep bolǵan.
Aqtam orta mektebiniń 10 synyp oqýshysy Shahsanam Týrsynova WhatsApp-taǵy statýsynda:
"Qazaq jeri dep keýde kere bermei-aq qoiyńdar, jer de, shańyraq ta Allanyki, sony bilińder qazaq balalary. Senderde kúsh joq, jeke shyǵyp sóilesýden qorqasyńdar. Aǵalaryńa kórsetip qoiyńdar, esli che, qyzdar!", – degen jazba qaldyrady.
Másele munymen shektelmegen. Taǵy bir óreskel jaittyń shetin shyǵarǵan jýrnalist Aqtamdaǵy mektepte biologiia páninen sabaq beretin Týrdibýbi Kaharovanyń qaǵaz-qujatty uiǵyr tilinde toltyratynyn tilge tiek etedi.
Mektep direktorynyń orynbasary qujatty memlekettik tilde toltyrýdy birneshe ret eskertkenmen, onyń sózin elemegen. Qai tilde toltyrsa da óz erki ekenin aityp, sonyń kesirinen úlken daýdyń tutanýyna sebepshi bolǵan.
Aita ketelik Týrdibývi Kaharova WhatsApp-ta qazaq ultyna til tigizgen Shahsanam Týrsynovanyń synyp jetekshisi.
Almaty oblysynyń ákimdigi jazylǵan jaidy birden baqylaýǵa alǵanyn habarlady.
"Máseleniń aq-qarasy anyqtalǵannan keiin, Uiǵyr aýdany ákiminiń orynbasary K.Bekmuhambetov Aqtam orta mektebiniń ustazdar ujymymen jáne oqýshylarmen kezdesti. Onyń ishinde Shahsanam Týrsynovamen túsindirý jumysy júrgizildi", – dep habarlaidy oblys ákimdiginiń baspasóz qyzmeti.
Mamyrdyń 19-ynda Uiǵyr aýdany ákimdigi janynan arnaiy komissiia qurylyp, osy jiynda Shahsanam Týrsynovanyń máselesi qaraldy.
Komissiia músheleriniń uiǵarymymen ata-ana mindetin durys atqarmaǵany úshin oqýshynyń sheshesi Lýiza Almahýnovany ákimshilik jaýapkershilikke tartý týraly sheshim qabyldandy.
Mektep basshylary da jazadan qutylǵan joq.
Nátijesinde Aqtam orta mektebiniń direktory Izmahýnov Oktiabr Týrganovich, direktordyń tárbie isi jónindegi orynbasary Qapsalamov Muqametqali laýazymdarynan bosatyldy.
Sonymen qatar osy mekteptiń biologiia pániniń muǵalimi Kaharova Túrdibývi de qyzmetinen bosady.
Budan bólek Aqtam aýyldyq okrýgi ákimi apparatynyń sport jónindegi ádisker- nusqaýshysy Kamaev Sabirjan Sýniatsýnovich jáne Tiirmen aýyldyq okrýgi ákimi apparatynyń jastar isi jónindegi ádisker- nusqaýshysy Iakiarova Ýmida jumysynan bosatyldy.
"Aldaǵy ýaqytta atalǵan jaittardyń qaitalanbaýy úshin oblystyq komissiia múshesi oblystyq Qazaqstan halqy assambleiasynyń hatshylyq meńgerýshisi Ǵabit Tursynbai aýdan belsendilerimen júzdesip, túsindirme jumystaryn júrgizedi. Aýdan halqy "bir qumalaqtyń" kesirinen tutas óńirge sóz tigenin alǵa tartyp, mundai keleńsiz jaittyń oryn alǵanyna ókinishterin bildirdi" , – dedi oblys ákiminiń baspasóz hatshysy Ǵalymurat Júkel.
"Ázir mekteptegi ahýal birqalypty. Jaǵdaidy baqylaýda ustaýdamyz", – deidi óz kezeginde Uiǵyr aýdanynyń ákimdigi.
Sýret qazaqtimes.com saitynan alyndy
