Prodiýser ári ánshi Móldir Muqan áleýmettik jelidegi paraqshasynda shyǵarmashylyǵyna qatysty qýanyshty jańalyǵyn bólisti, dep habarlaidy dalanews.kz.
Óner iesiniń aitýynsha, ol "Qazaqstan" ulttyq telearnasy túsirip jatqan jańa telehikaiaǵa shaqyrtý alǵan. Móldir Muqan bul usynysty qýana qabyldaǵanyn jetkizdi.
Jańa serialda ol Erlan esimdi keiipkerdiń jubaiynyń rólin somdaidy. Týyndyda dárigerlerdiń eńbegi, aq halatty jandardyń qoǵamdaǵy orny men jaýapkershiligi sóz bolmaq.
"Osy jazdyń erekshe jańalyǵy – serialǵa túsý týraly usynys. Árine, qabyl aldym. Bul men úshin óner jolymdaǵy erekshe jobalardyń biri boldy. Shaqyrtý kelgende qatty qýandym", – dedi Móldir Muqan.
Óner iesi serialdyń taqyrybynyń ózine erekshe áser etkenin de atap ótti. Onyń aitýynsha, adamdar dárigerlerdiń qadirin kóbine densaýlyqqa qatysty synaqqa tap bolǵan kezde tereńirek túsinedi.
Móldir Muqan osyndai mańyzdy taqyrypty ekran arqyly kóterip otyrǵan ulttyq arna men túsirilim tobyna alǵysyn bildirdi.
