Jýrnalist, zańger Lázzat Asanova Túrkistan oblysy Túlkibas aýdanynda avtoturaq jumysyna bólingen 47 mln teńgeniń qalai jumsalǵanyn ashyq jariialaýdy talap etti. Ol bul týraly áleýmettik jelidegi paraqshasynda jazdy, dep habarlaidy dalanews.kz.
Asanovanyń málimetinshe, qarajat Túlkibas aýdandyq turǵyn úi-kommýnaldyq sharýashylyq bólimi arqyly avtoturaqqa qatysty jumystardy júrgizýge qarastyrylǵan. Alaida onyń naqty qandai jumystarǵa jáne qalai jumsalǵany jóninde suraqtar týyndaǵan.
Jýrnalist máseleniń mán-jaiyn anyqtaý úshin atalǵan bólimge arnaiy barǵanyn aitady. Alaida bólim basshysyn jumys ornynan kezdestire almaǵan. Al mekeme ókilinen merdiger, oryndalǵan jumystar jáne biýdjet qarajaty jóninde naqty jaýap ala almaǵanyn málimdedi.
"47 million teńge – az qarajat emes. Sondyqtan birneshe qarapaiym suraqqa jaýap berilýi tiis: merdiger kim, smetada qandai jumystar kózdelgen, naqty qandai jumys atqaryldy, qabyldaý aktilerine kimder qol qoidy? Avtoturaqtyń quqyqtyq mártebesi qandai jáne onyń aqyly nemese tegin bolýy qai qujatpen belgilengen?", - dep jazdy Lázzat Asanova.
Onyń aitýynsha, bul bir jýrnalistiń jeke qyzyǵýshylyǵyna qatysty másele emes, biýdjet qarajatynyń ashyqtyǵyna bailanysty qoǵamdyq saýal. Zańger memlekettik organ halyq qarjysynyń jumsalýy týraly zańda belgilengen tártippen aqparat berýge mindetti ekenin atap ótti.
Osyǵan bailanysty ol Túlkibas aýdanynyń ákimdigi men aýdandyq turǵyn úi-kommýnaldyq sharýashylyq bóliminen 47 mln teńgege qatysty smetany, memlekettik satyp alý qujattaryn, merdiger týraly málimetti, oryndalǵan jumystar men olardy qabyldaý aktilerin ashyq jariialaýdy surady.
"Halyqtyń aqshasyna jumsalǵan ár teńgeniń esebi bolýy kerek. Qoǵam naqty ári qujatpen rastalǵan jaýap kútedi", - dedi jýrnalist.
