Túrkiia qazaǵy, ánshi, aqyn ári kompozitor Beshir Ahmet Kóse dúnieden ótti. Qaraly habardy jýrnalist Erjan Tólek jetkizdi, dep habarlaidy dalanews.kz.
Onyń aitýynsha, Beshir Ahmet Kóse Túrkiiadaǵy qazaq qaýymynyń kórnekti ókilderiniń biri bolǵan. Ol qazaq mádenietin túrki álemine tanytýǵa eleýli úles qosyp, Ystanbulǵa barǵan qazaqstandyq óner adamdary men sol elde bilim alǵan qazaq jastaryna únemi qoldaý kórsetken.
Jýrnalist marqumnyń adamgershiligi men shyǵarmashylyq bolmysyn erekshe atap ótti.
"Báshir aǵamyz Túrkiiadaǵy qazaqtardyń jarqyn ókiliniń biri edi. Júregi keń, baladai ańqyldaǵan taza adam bolatyn. Túrki álemine Qazaq mádenietiniń dáriptelýine teńdessiz úles qosty", – dep jazdy ol.
Sondai-aq Erjan Tólek Beshir Ahmet Kóseniń úiinde qonaq bolyp, onyń áńgimeleri men ánderin talai ret tyńdaǵanyn eske aldy.
"Ómirin ónerge ainaldyrǵan Báshir aǵa da bu dúnieni tárk etipti. Siz salǵan ánder men jarqyn beineńiz máńgi júregimizde. Túrkiiadaǵy qazaq jurtyna, aǵanyń áýletine qaiǵyra kóńil aitamyn", – delingen jazbada.
Beshir Ahmet Kóse 1955 jyly Túrkiianyń Salihli qalasynda dúniege kelgen. Onyń "Altai taýym", "Kóktem", "Jalǵyz kóńilim" sekildi ánderi kópshilikke belgili.
