AQSh prezidenti Donald Tramp Iranǵa qarsy tarihtaǵy eń qatań ekonomikalyq sharalardy engizetinin málimdedi. Onyń aitýynsha, Tegeran Vashingtonmen kelisim jasaý múmkindigin paidalanbaǵan, dep habarlaidy dalanews.kz.
Bul týraly Tramp Truth Social áleýmettik jelisindegi paraqshasynda jazdy.
«Islam Respýblikasyna kelisim jasaý úshin menen artyq múmkindik bergen eshbir memleket bolǵan joq. Ókinishke qarai, olar bul múmkindikti paidalanbady. Sondyqtan búgin men qandai da bir elge qarsy buryn-sońdy júrgizilgen eń kúiretkish ekonomikalyq operatsiiany jariialaimyn», – dedi Aq úi basshysy.
Tramp engiziletin shekteýlerdiń tek Iranǵa ǵana emes, oǵan qoldaý kórsetetin elderge de áser etetinin eskertti. Onyń sózinshe, bankteri, kompaniialary, áýejailary nemese memlekettik qurylymdary arqyly Tegeranǵa kómek kórsetken kez kelgen memleket «orasan zor ekonomikalyq saldarǵa» tap bolady.
AQSh prezidenti munai kontrabandasyn, qarjylyq svop operatsiialaryn, valiýta aiyrbastaý oryndarynyń jumysyn, kemelerdi tirkeý qyzmetin jáne jalǵan kompaniialar arqyly júrgiziletin operatsiialardy toqtatýǵa shaqyrdy.
Sondai-aq ol AQSh odaqtastaryn Irandy halyqaralyq oqshaýlaýǵa qosylýǵa úndedi.
«Bul – ekonomikalyq D-Day bolady. Iran eshqashan iadrolyq qarýǵa ie bolmaidy», – dep jazdy Tramp.
Aq úi basshysynyń pikirinshe, qazirgi ýaqytta Iran aýyr jaǵdaida tur. Ol Iran flotynyń joiylǵanyn, áskeri-áýe kúshteriniń talqandalǵanyn, áskeri zaýyttardyń qiraǵanyn jáne ulttyq valiýtanyń qunsyzdanǵanyn málimdedi.
Buǵan deiin Tramp Ormýz buǵazy AQSh týynyń tústerimen belgilengen kartany jariialap, ony «AQSh-tyń jańa aýmaǵy» dep ataǵan edi. Keiinirek onyń bul málimdemesi aýmaqtyń quqyqtyq mártebesin ózgertýge qatysty emes, tek saiasi ustanymyn bildirý maqsatynda jasalǵany belgili boldy.
Óz kezeginde Iran syrtqy ister ministriniń orynbasary Kazem Garibabadi Ormýz buǵazyn áleýmettik jelidegi jazbamen nemese birjaqty buiryqpen ielený múmkin emestigin aitty.
Eske salaiyq, buǵan deiin Tramp Ormýz buǵazy ashylmasa, AQSh Iranǵa aýyr soqqy jasaitynyn eskertken bolatyn.
