Memleket basshysy Qasym-Jomart Toqaev BUU Eriktiler baǵdarlamasynyń atqarýshy úilestirýshisi Toili Qurbanovty qabyldady, dep habarlaidy dalanews.kz.
Kezdesýde Prezident Qazaqstannyń volonterlik bastamalaryn qoldaǵany jáne Astanada ótip jatqan TMD volonterler forýmyna qatysqany úshin Toili Kýrbanovqa alǵys aitty.
Qasym-Jomart Toqaev Qazaqstanda volonterlik qozǵalysty damytýǵa erekshe kóńil bólinetinin atap ótti. Onyń aitýynsha, jańa Konstitýtsiiada volonterlik qyzmetti yntalandyrý alǵash ret konstitýtsiialyq deńgeide bekitilgen.
«Biz eriktilikti memlekettik saiasat turǵysynan shynaiy patriotizmniń jáne jastarǵa kórsetiletin memlekettik qoldaýdyń kórinisi retinde qarastyramyz. Meniń bastamammen jańa Konstitýtsiiaǵa volonterlik qaǵidalary engizildi», - dedi Prezident.
Memleket basshysynyń aitýynsha, Halyqaralyq eriktiler jyly aiasynda Qazaqstanda myńnan astam is-shara ótkizilip jatyr. Eldegi volonterler sany 300 myńǵa jýyqtaǵan.
Qazir volonterlik qozǵalysty 2030 jylǵa deiin damytý tujyrymdamasy ázirlenip jatyr. Sonymen qatar volonterdiń tsifrlyq pasporty engizilip, memlekettik qoldaý tetikteri men óńirlik infraqurylymdy jetildirý jumystary júrgizilýde.
Toili Kýrbanov Qazaqstan men BUU Eriktiler baǵdarlamasy arasynda joǵary deńgeidegi yntymaqtastyq ornaǵanyn atap ótip, volonterlik qozǵalysty damytýǵa kórsetip otyrǵan qoldaýy úshin Prezidentke alǵys bildirdi.
«Qazaqstan volonterlik qyzmet salasynda úlken biikterdi baǵyndyrǵan biregei el. Qazaqstannyń Eriktiler jylyn jariialaý jónindegi bastamasyn 60-tan astam memleket qoldady. Sizder jahandyq trend qalyptastyryp jatyrsyzdar. «Taza Qazaqstan» siiaqty qoǵamdyq aktsiialaryńyz birqatar elde úlken qyzyǵýshylyq týdyrýda», - dedi BUU ókili.
