Prezident Qasym-Jomart Toqaev VIII shaqyrylym Parlament depýtattarynyń jumysyna qorytyndy jasap, olardyń eldegi reformalardy júzege asyrýǵa eleýli úles qosqanyn málimdedi, dep habarlaidy dalanews.kz.
Memleket basshysy Parlament palatalarynyń sońǵy birlesken otyrysynda depýtattardyń zań shyǵarý qyzmeti men qoǵammen bailanysyna joǵary baǵa berdi.
«VIII shaqyrylym jumysy kezeńinde depýtattar eki myńnan astam depýtattyq saýal joldap, 30-dan astam Úkimet saǵatyn jáne toǵyz parlamenttik tyńdaý ótkizdi. Eki palatanyń beiindi komitetteri belsendi ári nátijeli jumys atqardy. Bolashaqta bir palataly Quryltaiǵa kóshýge bailanysty onyń komitetteriniń qurylymy memlekettik saiasattyń negizgi basymdyqtary men baǵyttaryn kórsetýi tiis», – dedi Qasym-Jomart Toqaev.
Prezidenttiń aitýynsha, depýtattar osy jyldar ishinde partiialyq jobalar men óńirlerge turaqty saparlar arqyly azamattarmen tiimdi keri bailanys júiesin qalyptastyrdy.
«Parlament bedeldi ǵalymdar, sarapshylar jáne azamattyq qoǵam belsendileri úshin naǵyz pikir almasý alańyna ainaldy. Bul biregei ziiatkerlik ekojúie Senat janyndaǵy Sarapshylar klýby men Májilis janyndaǵy Qoǵamdyq palataǵa súiendi. Olar nátijeli qoǵamdyq dialog ornatýǵa jáne zań jobalaryn jan-jaqty saraptaýǵa yqpal etti», – dedi Memleket basshysy.
Prezident sondai-aq Parlament qyzmeti «Zań jáne tártip» qaǵidatyn memlekettik saiasattyń ajyramas bóligine ainaldyrýǵa yqpal etkenin atap ótti.
«Sizder «Adal azamat» tujyrymdamasy men «Taza Qazaqstan» jalpyulttyq jobasyn ilgeriletýde sanaly kóshbasshylyq tanyttyńyzdar. Osy bastamalardyń arqasynda qoǵamda jańa progressivti qoǵamdyq etikanyń negizi qalandy. Sonymen qatar depýtattyq korpýs Qazaqstannyń halyqaralyq bedelin nyǵaitýǵa da qomaqty úles qosty. Parlamentaralyq assambleialardaǵy belsendi jumys, sheteldik saparlar men halyqaralyq forýmdarǵa qatysý arqyly zań shyǵarýshylarymyz sheteldik áriptestermen jáne halyqaralyq institýttarmen senimdi ári nátijeli bailanys ornatty», – dedi Prezident.
Qasym-Jomart Toqaev aldaǵy ýaqytta basty zań shyǵarýshy organǵa ainalatyn Quryltai osy institýtsionaldyq tájiribe men parlamenttik mádenietti saqtap, damytýy qajet ekenin aitty.
«Eldiń joǵary ókildi organy Ádiletti Qazaqstandy barsha azamatqa teń múmkindik beretin memleketti qurýǵa sheshýshi úles qosýy tiis. Quryltai óziniń jaýapty zań shyǵarý missiiasyn abyroimen atqara otyryp, qoǵamymyzda Zań men tártip, Eńbekqorlyq pen progress, Tazalyq pen tabiǵatqa janashyrlyq qaǵidattaryn ornyqtyrýǵa jan-jaqty yqpal etedi dep senemin», – dedi Memleket basshysy.
