Qasym-Jomart Toqaev Ulttyq qaýipsizdik komitetiniń 30 jyldyǵyna arnalǵan saltanatty jiynda UQK organdarynyń ardagerlerin, ofitserleri men qyzmetkerlerin quttyqtap, olardyń Qazaqstan memlekettigin nyǵaitýǵa qosqan úlesin atap ótti.
"Ulttyq qaýipsizdik júiesi - memlekettigimizdiń basty tuǵyry. Sondai-aq, derbes damýymyzdyń myzǵymas tiregi. Otan úshin aianbai eńbek etip júrgen azamattardyń arqasynda elimiz ósip-órkendeýde. Sizder ishki jáne syrtqy qaýip-qaterlerge der kezinde toitarys berip kelesizder. Búginde memlekettiń negizi jáne konstitýtsiialyq qurylymy berik qorǵalǵan. Táýelsizdigimizdiń qundylyqtary birneshe ret eleýli syn-qaterlerge tap keldi. Sizder beibitshilik pen kelisimdi saqtaý úshin tabandy eńbek ettińizder", - dedi Prezident.
Memleket basshysy ulttyq qaýipsizdik organdarynyń eki myńynshy jyldary terrorizm men radikaldy dini ekstremizmge qarsy kúreske qosqan úlesine toqtaldy.
Sondai-aq Syrtqy barlaý qyzmetiniń ulttyq múddeni qorǵaý jolynda óz mindetin tabysty oryndap kele jatqany jáne Komitettiń "A" arnaýly qyzmeti men Shekara qyzmetiniń jumystary týraly aitty.
"Jyl basynan beri Komitet qyzmetkerleriniń tiimdi jumysynyń arqasynda ekstremistik áreketterge qatysqan jáne terrorizmdi nasihattaǵan 42 adam ustaldy. Eki terrolyq aktiniń aldyn aldy. Uiymdasqan qylmysqa qarsy kúres qarqyndy júrgizilýde.
Ulttyq qaýipsizdik organdary politsiiamen birlesip, birqatar asa qaýipti qylmystyq topty quryqtady, bandittik uiymdardyń 22 múshesi tutqyndaldy. Nátijesinde 700-ge jýyq qarý-jaraq, 54 granata, 17 myńnan astam oq-dári tárkilendi.
Jarty jyldyń ishinde elimizde 15 esirtki laboratoriiasy, 23 halyqaralyq jáne 40 aimaqtyq esirtki kanaldary joiyldy, 3 esirtki plantatsiiasy áshkerelendi. Sheteldik seriktestermen birlesip, halyqaralyq esirtki tasymalyna qarsy kúres aiasynda 14 halyqaralyq arnaiy operatsiia júzege asyryldy", - dedi Qasym-Jomart Toqaev.
Memleket basshysynyń sóilegen sózinde keltirilgen derekterge sáikes Qazaqstan shekarashylary shekara jáne aýmaqtyq sýlar rejimin buzǵan 7 myńnan astam adamdy ustaǵan. Jalpy quny 8 milliard teńgeden asatyn valiýta, altyn jáne basqa da taýarlardyń zańsyz tasymalynyń joly kesilgen. Sonymen qatar arnaýly qyzmet elimizdiń aqparattyq qaýipsizdigin senimdi qamtamasyz etýde. Elimizdiń mańyzdy infraqurylymdyq nysandaryna jasalǵan 1,5 myń DDoS shabýylyna sátti toitarys berildi.
"Ulttyq qaýipsizdikti qorǵaý isi kóbinese el nazarynan tys júrgiziledi. Ony kópshilik bile bermeidi. Degenmen, sizderdiń jumystaryńyzdyń mán-mańyzy airyqsha. Shynaiy patriotizm ataq úshin emes, Otan úshin elge adal qyzmet etýden kórinedi. Biz el múddesin qorǵaý jolynda qurban bolǵan qaharmandardy eshqashan umytpaimyz. Olardyń erlik isteri jurtqa jariialanbaidy. Biraq esimderi Ulttyq qaýipsizdik qyzmetiniń jylnamasyna altyn árippen jazylady. Komitet ardagerlerine kóp jylǵy eńbegi úshin zor alǵys aitamyn", - dedi Qasym-Jomart Toqaev.
Prezident kúsheiip kele jatqan geosaiasi shielenis, buryn-sońdy bolmaǵan sanktsiialyq teketires, gibridti qaqtyǵystardyń taralýy ulttyq qaýipsizdikke jańa syn-qaterler qaýpin tóndiredi dep sanaidy. Onyń pikirinshe, qarqyndy jahandaný men jappai tehnologiialyq tóńkeris elder arasyndaǵy shekaranyń ashyq bolýyna ákep soqtyrdy. Memleketterdiń bir-birine táýeldiligi artady jáne mundai jaǵdaida Qazaqstannyń aqparattyq jáne áleýmettik-mádeni keńistigine syrtqy kúshterdiń yqpaly kúsheie túsedi.
"Aldymyzda memlekettik jáne qoǵamdyq institýttardyń ornyqty ári tiimdi jumys isteýin, azamattardyń qaýipsizdigin qamtamasyz etý mindeti tur.
Qańtardaǵy qasiretti kúnderde Komitettiń birqatar basshylarynyń namyssyzdyǵy men satqyndyǵyna qaramastan, kóptegen ofitserlerimiz óz anttaryna adal bolyp, batyl áreket etti, naǵyz erlik kórsetti.
Ózge elderde jýyrda bolǵan aýqymdy qaqtyǵystar turaqtylyq bolmai, ornyqty damý múmkin emes ekenin taǵy da bir kórsetip berdi. Ulttyq qaýipsizdik - memleketterdiń básekege qabilettiligin arttyrýdyń sheshýshi faktory. Arnaýly qyzmetter jumysynyń tabysty bolýy memleketterdiń ishki saiasi turaqtylyǵyna ǵana emes, sondai-aq olardyń ornyqty ekonomikalyq damýyna aitarlyqtai dárejede bailanysty", - dedi Memleket basshysy.
Qasym-Jomart Toqaev elimizdiń Jańa Qazaqstandy qurýǵa kiriskenin, qoǵamnyń barlyq salasynda túbegeili jańǵyrtýlar júrgizile bastaǵanyn málimdedi. Memleket azamattyq qoǵamdy dáiekti túrde damytyp, demokratiialyq qaǵidattardy qorǵaidy. Onyń aitýynsha, bul - elimizdiń damýy úshin óte mańyzdy qadam. Sondyqtan ádildik jáne zań ústemdigi osy jolda basty baǵdar bolady. Prezident mamyr aiynda Ulttyq qaýipsizdik komitetin reformalaý, iaǵni onyń qyzmetin túbegeili transformatsiialaý jáne ulttyq qaýipsizdik júiesin basqarý sapasyn arttyrý jónindegi Jarlyqqa qol qoiǵanyn eske saldy.
"Ózgeristerdiń bárin tabysty júzege asyrý úshin bizge kez kelgen qaýipke tiimdi qarsy tura alatyn zamanaýi arnaýly qyzmet kerek.
Ulttyq qaýipsizdik organdary ulttyq múddelerdi qorǵaýda jáne kúsheiip kele jatqan zamanaýi syn-qaterlerge qarsy kúreste aldyńǵy shepte bolady.
Sondyqtan analitikalyq jáne aqparattyq barlaý jumystaryna basa mán bere otyryp, problemalardy bastapqy satysynda joiý qajet. Qazaqstan jahandyq jáne óńirlik qaýipsizdikti nyǵaitýǵa baǵyttalǵan teńgerimdi ári syndarly syrtqy saiasat júrgizedi.
Sondyqtan elimizdiń odaqtasy jáne strategiialyq seriktesi sanalatyn memlekettermen aradaǵy tabysty yntymaqtastyqty arnaýly qyzmetter salasy boiynsha damytý óte mańyzdy. Qaýipsizdik salasyndaǵy strategiialyq maqsattardy júzege asyrý kezinde azamattar quqyǵynyń taptalýyna jáne elimizde iskerlik klimattyń buzylýyna jol berýge múlde bolmaidy", - dedi Prezident.
Memleket basshysynyń pikirinshe, arnaýly organda qyzmet etý, eń aldymen, jan-jaqty, san qyrly bilim iesi bolýdy, kez kelgen jaǵdaidy tereń zerttep, salmaqty, parasatty sheshim qabyldai bilýdi talap etedi.
"Komitettiń árbir qyzmetkeri óz isine adal jáne naǵyz maman bolýǵa tiis. Qandai jaǵdai bolsyn, memleket múddesi bárinen joǵary turýy qajet. Sizderdiń kásibi qabiletterińiz ben jeke adami qasietterińizdiń arqasynda el múddesi tiisti deńgeide qorǵalatyny anyq. Sondai-aq azamattarymyzdyń bilikke degen senimi artyp, memleketimizdiń bolashaǵy jarqyn bolmaq. Sondyqtan kez kelgen jaǵdaidy tereń zerttep, salmaqty, parasatty sheshim qabyldai bilý - óte mańyzdy mindetterińiz", - dedi Qasym-Jomart Toqaev.
Jiyn sońynda Prezident ulttyq qaýipsizdik organdarynyń birqatar qyzmetkerin memlekettik nagradalarmen marapattady.
https://dalanews.kz/aimak/79364-qonaev-qalasynda-asyq-oynaytyn-alangsh
https://dalanews.kz/del-qazir/79282-reseyge-otpek-bolgan-karim-masimovt
