Prezident Qasym-Jomart Toqaev Úkimetke Qazaqstannyń tolyq tsifrlyq memleketke kóshýin jedeldetýdi jáne tsifrlyq infraqurylymdy qarqyndy damytýdy tapsyrdy, dep habarlaidy dalanews.kz.
Memleket basshysy Parlament palatalarynyń birlesken otyrysynda Qazaqstan tsifrlyq transformatsiia salasynda Ortalyq Aziiadaǵy kóshbasshyǵa ainalǵanyn atap ótti.
«Elimiz álemde alǵashqylardyń biri bolyp mańyzy zor revoliýtsiialyq Tsifrlyq kodeksti jáne «Jasandy intellekt týraly» zańdy qabyldady. Bul tolyq tsifrlyq memleketke júieli kóshý úshin zamanaýi infraqurylymdyq negiz qalyptastyrýǵa múmkindik berdi. Qazirdiń ózinde naqty nátijelerdi kórip otyrmyz. Úkimetterdiń jasandy intellektke daiyndyq indeksinde Qazaqstan Ortalyq Aziiada kósh bastap tur. Biraq bul uzaq joldyń basy ǵana», – dedi Qasym-Jomart Toqaev.
Prezidenttiń aitýynsha, Parlamenttiń segizinshi shaqyrylymy jasandy intellektti quqyqtyq turǵydan retteýge alǵash bolyp jol ashty. Sonymen qatar jańa Konstitýtsiiada azamattardyń kiberkeńistiktegi jeke derekterin qorǵaý quqyǵy bekitilgen.
Memleket basshysy jasandy intellekt ekonomikanyń barlyq negizgi salalaryna jáne memlekettik basqarý júiesine engizilýi tiis ekenin aitty.
«Bizdiń tsifrlyq bankter men finteh-kompaniialar azamattar men biznes úshin qarjy, saýda jáne memlekettik qyzmetterdi biriktiretin qolaily ekojúieler qalyptastyrdy. Sonyń nátijesinde sońǵy bes jylda elektrondy saýda naryǵy segiz esege jýyq ósip, 3,7 trillion teńgege jetti. Bul bólshek saýda kóleminiń shamamen 15 paiyzyn quraidy. Bul kórsetkish azamattardyń tsifrlyq ortaǵa degen joǵary senimin jáne tutynýshylyq minez-qulyqtyń ózgergenin kórsetedi. Osy qarqyndy báseńdetpeý úshin memleket infraqurylymdy ozyq qarqynmen damytýy qajet», – dedi Prezident.
Toqaevtyń aitýynsha, bul baǵyttaǵy mańyzdy qadamdardyń biri – qýatty sýperkompiýterlerdi iske qosý. Olar jasandy intellektti memlekettik basqarý, ekonomika jáne ulttyq qaýipsizdik salalarynda qoldanýǵa múmkindik beredi.
Prezident «Derekter ortalyqtarynyń alqaby» (Data Center Valley) megajobasynyń mańyzyn da erekshe atap ótti.
«Alaida jasandy intellektke orasan zor energiia kólemi men esepteý qýaty qajet. Sondyqtan jetekshi álemdik BigTech korporatsiialaryn tartýǵa arnalǵan «Derekter ortalyqtarynyń alqaby» megajobasyn iske qosý erekshe mańyzdy. Bul mindet Úkimettiń turaqty nazarynda bolýy tiis. Onyń oryndalýyn jeke baqylaýda ustaimyn. Biz qazirdiń ózinde Jańa Jibek jolynyń joǵary tehnologiialyq haby retinde elimizdiń tsifrlyq egemendigin qalyptastyryp jatyrmyz. Biraq eń qýatty sýperkompiýterler men zamanaýi derekter ortalyqtary bilikti mamandarsyz paidasyz. Sondyqtan bolashaqtyń sáýletshileri men ázirleýshilerin mektep qabyrǵasynan bastap daiarlap jatyrmyz. Alem.ai halyqaralyq ortalyǵynyń bazasynda jańa býynnyń eki innovatsiialyq mektebi ashyldy. Al jańa oqý jylynda Ortalyq Aziiadaǵy alǵashqy mamandandyrylǵan jasandy intellekt ýniversiteti óz jumysyn bastaidy», – dedi Memleket basshysy.
Prezident memlekettik basqarý júiesiniń de tolyq tsifrlyq formatqa kóshetinin aityp, ondaǵan myń memlekettik qyzmetkerdiń arnaiy oqytý baǵdarlamalarynan ótip jatqanyn jetkizdi.
«Biz memlekettik basqarýdyń logikasy men filosofiiasyn túbegeili ózgertýimiz kerek. Dástúrli biýrokratiialyq júieden joǵary tiimdi «Memleket – platforma» (GovTech) modeline batyl kóshýimiz qajet. Bizdiń túpki maqsatymyz – jahandyq tehnologiialyq keńistikte óz ornyn alǵan, ulttyq múddeni tiimdi qorǵaityn ári azamattarǵa minsiz qyzmet kórsetetin zamanaýi tsifrlyq memleket qurý», – dep túiindedi Qasym-Jomart Toqaev.
