KSRO taraǵannan keiin otyz jyl ótken soń Ulybritaniianyń Ulttyq arhivinde Qazaqstan Prezidenti Qasym-Jomart Toqaev týraly aitylǵan qujattar qoljetimdi boldy. Olardyń úzindilerin ázerbaijandyq tarihshy Djamil Gasanly jariialady, dep habarlaidy dalanews.kz.
1994 jyly Qasym-Jomart Toqaev Qazaqstannyń Syrtqy ister ministri bolyp taǵaiyndalǵan kezde Ulybritaniia Syrtqy ister ministrligi ol týraly arnaiy anyqtama daiyndaǵan.
Qujatta Toqaevtyń bilimi, shet tilderin bilýi, Qytai men Ońtústik-Shyǵys Aziia elderindegi jumys tájiribesi atap ótilgen.
"Vedomstvo ol týraly óte qyzyqty anyqtamalar daiyndap, jaqsy daiarlanǵan maman retinde sipattaǵan. Britandyqtardyń boljamy aqtaldy. Búginde Toqaev óz halqymen sanaspaityn postkeńestik keńistiktegi jemqor jáne avtoritarlyq basshylardan aitarlyqtai erekshelenedi", – dep jazdy Gasanly.
Qujattarda Toqaevtyń AQSh, Kanada jáne Ózbekstanǵa belsendi sapar jasaǵany, sheteldik áriptesterimen bailanys ornatqany jáne Qytaimen shekarada erkin ekonomikalyq aimaqtar qurýdy usynǵany da kórsetilgen.
Ázerbaijandyq tarihshynyń jazbasyna saiasi sholýshy Ǵaziz Ábishev te nazar aýdardy.
Onyń aitýynsha, jariialanǵan qujattyń Ulybritaniianyń saiasi basshylyǵyna arnalyp daiyndalǵanyn boljaýǵa bolady.
"Qujattaǵy mekenjaiǵa qarasaq, ol Ulybritaniianyń saiasi basshylyǵy úshin ázirlengen bolýy múmkin. Óitkeni Daýning-strit, 10 mekenjaiynda premer-ministrdiń keńsesi ornalasqan.
Jalpy mundai tájiribe belsendi diplomatiialyq qyzmetterdiń kópshiligine tán. Al álemdik yqpalǵa umtylatyn memleketterde, sonyń ishinde anglosakson elderi, olardyń odaqtastary men qarsylastarynda ulttyq elitalardy saraptaý júiesi jaqsy jolǵa qoiylǵan", – dep jazdy ol.
