"Qazaqstan Respýblikasy halqynyń qaýipsizdigin qamtamasyz etý maqsatynda Qazaqstan Respýblikasy Konstitýtsiiasynyń 44-babynyń 16) tarmaqshasyna jáne «Tótenshe jaǵdai týraly» Qazaqstan Respýblikasy Zańynyń 4, 5, 6-baptaryna sáikes QAÝLY ETEMIN:
- Dúniejúzilik densaýlyq saqtaý uiymynyń jańa COVID-19 koronavirýsyn pandemiia dep jariialaýyna bailanysty azamattardyń ómiri men densaýlyǵyn qorǵaý maqsatynda Qazaqstan Respýblikasynyń barlyq aýmaǵynda 2020 jylǵy 16 naýryzdaǵy 08 saǵat 00 minýt pen 2020 jylǵy 15 sáýirdegi 07 saǵat 00 minýt kezeńinde tótenshe jaǵdai engizilsin.
- Tótenshe jaǵdaidyń kezeńinde Qazaqstan Respýblikasynyń Prezidenti janyndaǵy Tótenshe jaǵdai rejimin qamtamasyz etý jónindegi memlekettik komissiia osy Jarlyqqa qosymshaǵa sáikes quramda qurylsyn jáne oǵan «Tótenshe jaǵdai týraly» Qazaqstan Respýblikasynyń Zańynda kózdelgen ókilettikter berilsin.
- Tótenshe jaǵdaidyń kúshinde bolý kezeńinde mynadai sharalar jáne ýaqytsha shekteýler engizilsin:
1) qoǵamdyq tártiptiń saqtalýy, asa mańyzdy memlekettik jáne strategiialyq, erekshe rejimdik, rejimdik jáne erekshe qorǵalatyn obektilerdiń, sondai-aq halyqtyń tynys-tirshiligin jáne kólik qyzmetiniń jumys isteýin qamtamasyz etetin obektilerdiń kúzetilýi kúsheitilsin;
2) iri saýda obektileriniń jumys isteýine shekteý qoiylsyn;
3) saýda oiyn-saýyq ortalyqtarynyń, kinoteatrlardyń, teatrlardyń, kórmelerdiń jáne adamdar kóp jinalatyn basqa da obektilerdiń qyzmetin toqtata tursyn;
4) karantin engizsin, sanitariialyq-epidemiiaǵa qarsy aýqymdy is-sharalardy, onyń ishinde Qazaqstan Respýblikasy Qorǵanys ministrliginiń jáne ishki ister organdarynyń halyqtyń sanitariialyq-epidemiologiialyq salamattylyǵy salasyndaǵy qyzmetti júzege asyratyn qurylymdyq bólimsheleriniń qatysýymen júzege asyrsyn;
5) oiyn-saýyq, sporttyq jáne basqa da buqaralyq is-sharalardy, sondai-aq otbasylyq, salt-dástúr is-sharalaryn ótkizýge tyiym salynsyn;
6) Qazaqstan Respýblikasynyń jáne shet memleketterdiń diplomatiialyq qyzmetiniń personalyn, sondai-aq Qazaqstan Respýblikasy Syrtqy ister ministrliginiń shaqyrýymen Qazaqstan Respýblikasyna keletin halyqaralyq uiymdar delegatsiialarynyń múshelerin qospaǵanda, Qazaqstan Respýblikasynyń aýmaǵyna kóliktiń barlyq túrlerimen kirýge, sondai-aq onyń aýmaǵynan shyǵýǵa shekteýler belgilensin.
- Tótenshe jaǵdai rejimi kezinde qoldanylatyn sharalardyń iske asyrylýyna jaýapty bolyp Qazaqstan Respýblikasynyń Prezidenti janyndaǵy Tótenshe jaǵdai rejimin qamtamasyz etý jónindegi memlekettik komissiia, Qazaqstan Respýblikasynyń Ishki ister ministrligi, Qazaqstan Respýblikasynyń Ulttyq qaýipsizdik komiteti, Qazaqstan Respýblikasynyń Qorǵanys ministrligi, Qazaqstan Respýblikasynyń Densaýlyq saqtaý ministrligi, Qazaqstan Respýblikasynyń Indýstriia jáne infraqurylymdyq damý ministrligi, Qazaqstan Respýblikasynyń Qarjy ministrligi, Nur-Sultan, Almaty, Shymkent qalalarynyń jáne oblystardyń ákimderi aiqyndalsyn.
- Qazaqstan Respýblikasynyń Bas Prokýrory osy Jarlyqta belgilengen sharalar men ýaqytsha shekteýlerdi iske asyrý kezinde zańdylyqtyń saqtalýyn qamtamasyz etsin.
- Qazaqstan Respýblikasynyń Úkimeti:
1) tótenshe jaǵdai rejimin qamtamasyz etý úshin Qazaqstan Respýblikasynyń Úkimeti rezervinen qajetti qarajattardy bólsin;
2) meditsinalyq tekserýden jáne emdelýden, karantindik rejimdi saqtaýdan bas tartatyn, epidemiologiialyq jaǵdaidy aiqyndaý úshin mańyzy bar derekterdi jasyratyn adamdarǵa baqylaý, sondai-aq atalǵan adamdardyń jaýaptylyǵynyń sharalary kúsheitilsin;
3) ortalyq jáne jergilikti memlekettik organdarmen birlesip, Qazaqstan Respýblikasynyń aýmaǵynda COVID-19 koronavirýsynyń taralýyn boldyrmaý maqsatynda osy Jarlyqty iske asyrý jóninde ózge de sharalardy qabyldasyn.
- Osy Jarlyq qol qoiylǵan kúninen bastap qoldanysqa engiziledi", - delingen qaýlyda.
