Belgiiaǵa resmi saparmen barǵan Prezident Qasym-Jomart Toqaev Belgiia Premer-ministri Bart de Vevermen kezdesip, saiasi dialogty nyǵaitý, saýda-ekonomikalyq jáne investitsiialyq yntymaqtastyqty keńeitý máselelerin talqylady, dep habarlaidy dalanews.kz.
Memleket basshysy Belgiiany Qazaqstannyń Eýropalyq odaqtaǵy negizgi seriktesteriniń biri dep atady. Onyń aitýynsha, sońǵy 20 jylda Belgiiadan Qazaqstan ekonomikasyna tartylǵan tikelei investitsiia kólemi 15 mlrd dollarǵa jetken.
«Qazaqstanda belgiialyq kapitaldyń qatysýymen 110-nan astam kompaniia jumys isteidi. Bul ózara tiimdi yntymaqtastyqty nyǵaitýǵa degen ortaq umtylysty kórsetedi. Tanymal belgiialyq kompaniialar bizdiń eldiń naryǵyna kóptep kelip jatyr», – dedi Qasym-Jomart Toqaev.
Prezidenttiń aitýynsha, byltyr eki el arasyndaǵy taýar ainalymy 580 mln dollardan asqan.
Kezdesý barysynda kólik-logistika, asa mańyzdy mineraldar, munai-himiia, aýyl sharýashylyǵy, ónerkásip, tsifrlyq transformatsiia, jasandy intellekt jáne qarjy salalaryndaǵy birlesken jobalardy júzege asyrý máseleleri qaraldy.
Óz kezeginde Bart de Vever Belgiianyń Qazaqstanmen strategiialyq seriktestikti keńeitýge múddeli ekenin aitty.
«Belgiia ekijaqty qarym-qatynasty odan ári tereńdetýge jáne strategiialyq seriktestik aiasyn keńeitýge nietti», – dedi Belgiia premer-ministri.
Qasym-Jomart Toqaev Belgiia Koroli Filipptiń biyl Qazaqstanǵa jasaityn memlekettik saparyna erekshe mán beretinin atap ótti.
«Qos memleket arasyndaǵy qatynastar tarihynda alǵash ret Korol Filipptiń Qazaqstanǵa memlekettik saparmen kelýi ekijaqty yntymaqtastyqty jańa deńgeige kóteredi dep senemin», – dedi Memleket basshysy.
Prezident Bart de Veverdi Qazaqstanǵa resmi saparmen kelýge shaqyryp, premer-ministr bul usynysty yqylaspen qabyl aldy.
