Qazaqstannyń ishki ister ministrligi Kyzdar.net saityn ne úshin buǵattai almai otyrǵanyn túsindirdi, dep habarlaidy Dalanews.kz.
Ishki ister ministrligi mádeniet jáne aqparat ministrligimen birlesip, zańsyz kontent taratatyn saittardy buǵattaý boiynsha kún saiyn sharalar qabyldap júrgenin atap ótti. Bul baǵytta IIM tiisti suraý hattardy turaqty túrde joldap jatqan kórinedi.
"Qazirgi ýaqytta eki ministrliktiń birlesken jumys toby jumys isteidi. Onyń basty mindeti – "Kyzdar.net" saity men onyń domenderin shuǵyl ári kúndelikti buǵattap otyrý. Alaida sait ákimshileri mekenjailar men domenderdi únemi ózgertip otyrady, sonyń arqasynda resýrs qaitadan qoljetimdi bolyp shyǵa keledi. Osyǵan bailanysty IIM jańa siltemelerdi der kezinde anyqtap, qoljetimdiligin shekteý jumysyn jalǵastyrýda", - delingen jaýapta.
Aita keteiik, 2023 jyly 15 naýryzda Kyzdar.Net saitynyń top-menedjerleri ustalǵan bolatyn. IIM respýblika aýmaǵynda 11 adamnan quralǵan qylmystyq toptyń jolyn kesti. Olar "Kyzdar.Net" internet-saity arqyly jezókshelikke jarnama jasap, onlain jeńgetailyqpen ainalysqan jáne kún saiyn 2 million teńgege deiin paida túsirip otyrǵan.
Qylmystyq topqa qatysýshylardyń jalpy aqsha ainalymy 8 milliard teńge bolady (ortasha alǵanda jylyna 2 milliard teńgeden asady). Saitqa jynystyq sipattaǵy 6 myńǵa jýyq habarlandyrý salynǵan. Saýalnamalar boiynsha qabyldanǵan sharalar nátijesinde 150 adam anyqtalyp, olardan jaýap alynǵan, olar saittyń top-menedjerlerine júieli túrde aqsha aýdaryp otyrǵandaryn rastady.
