Shymkent mańynda bolǵan aýyr jol apatynan bir otbasynyń úsh múshesi kóz jumdy. Qaza tapqandardyń ekeýi – kámeletke tolmaǵan balalar, dep habarlaidy dalanews.kz.
Stan.kz jazýynsha, kólikte 44 jastaǵy Gaýhar Ózilbaeva, onyń oqýǵa endi túsken qyzy jáne týystarynyń 11 jastaǵy balasy bolǵan.
Otbasy músheleriniń aitýynsha, olar jeksenbi kúni Arystan Shymkentke qarai jolǵa shyqqan. Balalarǵa mektepke qajetti kiim-keshek alý josparlanǵan. Olarǵa Astanadan kelgen týystary da qosylǵan.
Qaiǵyly oqiǵa jaqyndarynyń kóz aldynda bolǵan. Marqum 11 jastaǵy Aidostyń ákesi Erǵali Ózilbaidyń sózinshe, ol alda kele jatqan, al týystary mingen kólik artynan júrgen.
Onyń aitýynsha, bir sátte qarsy baǵyttan júk kóligi ótkennen keiin apat bolǵan.
"Birden keri burylyp, oqiǵa ornyna bardym. Júk kóliginiń ieleri alǵashynda videojazba bar ekenin aitty. Keiin kamera jumys istemeidi, fleshka joq dedi. Júrgizýshiniń de aitqany ártúrli boldy", – dedi marqumnyń ákesi.
Bul – otbasy tarapynyń málimdemesi. Oqiǵanyń naqty sebepteri tergeý barysynda anyqtalmaq.
Shymkent qalalyq politsiia departamenti 9 tamyzda Shymkent – Badam tasjolynda bolǵan jol-kólik oqiǵasyna bailanysty qylmystyq is qozǵalǵanyn habarlady.
"Qazirgi ýaqytta oqiǵanyń barlyq mán-jaiyn anyqtaýǵa baǵyttalǵan qajetti tergeý áreketteri júrgizilip jatyr. Tergeý nátijesi boiynsha tiisti protsessýaldyq sheshim qabyldanady", – delingen politsiia habarlamasynda.
Qara jamylǵan otbasy úsh adamdy sońǵy saparǵa shyǵaryp salǵan. Jaqyndary apattyń sebepteri jan-jaqty anyqtalyp, kináli tulǵalarǵa zań aiasynda baǵa berilýin talap etip otyr.
