Shyǵys Qazaqstan oblysynda aiý 58 jastaǵy er adamǵa tap berdi. Aýyr jaraqat alǵan turǵyn birneshe kún jansaqtaý bóliminde jatqan, dep habarlaidy dalanews.kz.
YK-news.kz málimetinshe, oqiǵa biyl shilde aiynyń sońynda Ridder mańyndaǵy Batys Altai memlekettik tabiǵi qoryǵyna jaqyn ornalasqan demalys bazasynyń janynda bolǵan. Kýágerlerdiń aitýynsha, aiý sol aýmaqta omartashy bolyp jumys isteitin er adamǵa tutqiyldan shabýyl jasaǵan.
Oqiǵa ornynda bolǵan taǵy eki adam aiýǵa qarsy turyp, zardap shegýshini qutqaryp qalǵan. Osydan keiin jyrtqysh ormanǵa qashyp ketken.
Ridder qalalyq aýrýhanasynyń málimetinshe, er adamnyń basy, qoly men aiaǵyna kóptegen aýyr jaraqat túsken. Sondai-aq onyń qoly men aiaǵy súiekteri yǵysyp, ashyq synǵan. Naýqas birneshe kún jansaqtaý bóliminde em qabyldap, keiin travmatologiia bólimine aýystyrylǵan. 19 tamyzda aýrýhanadan shyǵarylǵan turǵyn qazir úiinde emin jalǵastyryp jatyr.
Oqiǵadan keiin aýmaqqa qarýlanǵan inspektorlar jiberilip, adam ómirine qaýip tóndirgen aiýdyń kózi joiylǵan.
«Aiýdyń adamǵa naqty ne sebepti shabýyl jasaǵanyn aita almaimyn. Qazir bul aýmaqta qaýip joq. Biyl turǵyndardan aiýlarǵa qatysty ótinish óte kóp túsip jatyr. Biz oqiǵa ornyna baryp, olardy úrkitip qaitaramyz. Al adam ómirine tikelei qaýip tóngen jaǵdaida atýǵa týra keledi. Buǵan deiin aiýlardyń malǵa shapqan nemese adamdarǵa tym jaqyn kelgen kezderi bolǵan. Alaida meniń tájiribemde adamnyń ózine shabýyl jasaǵan alǵashqy jaǵdai osy», – dedi orman jáne ańshylyq sharýashylyǵy jedel áreket etý jasaǵy bastyǵynyń orynbasary Sergei Karmannikov.
Mamannyń sózinshe, keiingi jyldary óńirdegi aiýlar sany kóbeigen. Byltyr urǵashy aiýlardyń árqaisysy eki-úshten qonjyq ertken jaǵdailar jii baiqalǵan.
Sonymen birge sońǵy eki jyldaǵy úsik pen qurǵaqshylyq saldarynan ormanda jidek pen samyrsyn jańǵaǵy azaiǵan. Azyq tapshylyǵyna ushyraǵan jyrtqyshtar qoqys oryndaryna, qaraýsyz qalǵan saiajailar men turǵyndardyń baý-baqshasyna kelip, qorek izdeýge májbúr bolyp otyr.
