Qazaqstan Syrtqy ister ministrligi Nepal men Qytai shekarasynda bolǵan sý tasqynynan zardap shekkender men iz-túzsiz joǵalǵandar arasynda Qazaqstan azamattary joq ekenin málimdedi, dep habarlaidy dalanews.kz.
Vedomstvonyń habarlaýynsha, qazirgi ýaqytta qazaqstandyqtar týraly mundai aqparat tirkelmegen. Sondai-aq ministrlik jaǵdaidy baqylaýda ustap otyrǵanyn jetkizdi.
Buǵan deiin Reuters agenttigi Nepaldyń týrizm basqarmasyna silteme jasap, tabiǵi apattan keiin iz-túzsiz joǵalǵan shetel azamattarynyń qatarynda Belarýs, Belgiia, Finliandiia, Frantsiia, Vengriia, Irlandiia, Izrail, Qazaqstan, Latviia, Litva, Niderland, Filippin, Portýgaliia, Ispaniia jáne Shvetsiia azamattary bar ekenin habarlaǵan bolatyn.
Alaida Qazaqstannyń Syrtqy ister ministrligi qazirgi ýaqytta qazaqstandyqtardyń zardap shekkeni nemese joǵalǵany týraly aqparat rastalmaǵanyn atap ótti.
Eske salaiyq, Qytaimen shekaralas Nepaldyń taýly Rasýva aýdanynda bolǵan sý tasqyny saldarynan keminde 157 adam qaza tapty.
Buǵan deiin 384 adamnyń, onyń ishinde 290 sheteldik azamattyń iz-túzsiz joǵalǵany habarlanǵan bolatyn. Nepal Tourism ulttyq týristik uiymynyń málimetinshe, qutqarýshylar izdep jatqan adamdardyń arasynda Germaniia, Ispaniia, Niderland, AQSh, Aýstraliia, Ulybritaniia jáne basqa da elderdiń azamattary bar. Uiym deregine sáikes, sý tasqyny kezinde joǵalǵan týristerdiń basym bóligi Úndistan azamattary.
