Shymkent ákiminiń orynbasary Rýslan Berdenovke qastandyq jasaldy, dep habarlaidy Dalanews.kz.
Bul týraly jýrnalist Mihail Kozachkov habarlady.
"Shymkentte tótenshe jaǵdai boldy, ákimniń orynbasary Rýslan Berdenovke qastandyq jasaldy. Ol jaraqat alyp, aýrýhanaǵa jetkizildi. Atqan adam ustaldy", deidi Mihail Kozachkov.
Berdenov ańshy myltyǵynan atylǵan oqtan jaraqat alyp, jedel túrde aýrýhanaǵa jetkizilgen.
Oqiǵa kýágerleriniń jáne quqyq qorǵaý organdarynyń bergen aldyn ala málimetinshe, qala ákimdigine qarasty jaýapkershiligi shekteýli seriktestiktiń qyzmetkeri Berdenovke ańshy myltyǵymen oq atqan. Politsiia kúdiktini oqiǵa ornynda dereý ustaǵan.
Qazir qala ákiminiń orynbasary Rýslan Berdenov aýrýhanada jatyr, onyń jaǵdaiy týraly naqty málimet áli berilgen joq.
Quqyq qorǵaý organdary oqiǵa boiynsha qylmystyq is qozǵap, tergeý amaldaryn bastap ketti. Qazirgi ýaqytta atalǵan jaitqa bailanysty Shymkent politsiia departamenti, Ishki ister ministrligi men «Respublica» partiiasy resmi pikir ázirlep jatyr. Aita keteiik, Rýslan Berdenov osy partiianyń múshesi.
Rýslan Berdenov Shymkent qalasy ákiminiń orynbasary qyzmetine biyl aqpan aiynda taǵaiyndalǵan bolatyn. Oqiǵanyń naqty sebebi men mán-jaiy ázirge belgisiz kúiinde qalyp otyr. Qazir qalada jaǵdai baqylaýǵa alynyp, kúsheitilgen qaýipsizdik sharalary engizildi.
Bul jaitqa qatysty Shymkent qalasynyń politsiia departamenti pikir bildirdi.
Politsiia málimetinshe, atalǵan qylmysty jasaǵan kúdikti ustalyp, ýaqytsha ustaý izoliatoryna qamaldy. Atalǵan fakti boiynsha qylmystyq is qozǵaldy. Oqiǵanyń barlyq mán-jaiy tergeý barysynda anyqtalady. Tergeý múddesine bailanysty ózge aqparat jariia etilmeidi.
