Qazaqstan Respýblikasy ishki ister ministri Erjan Sádenov Sherzat Bolattyń ólimine qatysty qylmystyq is boiynsha kúdiktilerdiń týǵan kúndi atap ótýi týraly pikir bildirdi, dep habarlaidy Dalanews.kz.
“Sherzat B.-ǵa qatysty iste qamtylǵan, kúdiktilerdi ustaý jaǵdailaryna bailanysty joldanǵan ótinishte kórsetilgen derekter boiynsha qyzmettik tergeý júrgizildi. Nátijesinde kináli alty qyzmetker tártiptik jaýapkershilikke tartyldy”, — dedi ministr Sadenov Májilis depýtaty Maksat Tolyqbaidyń saýalyna jaýap bere otyryp.
Aita keteiik, Sherzattyń ólimine qatysy bar degen kúdiktilerdiń izoliatorda týǵan kún toilaǵan videosy áleýmettik jelilerde tarap ketken edi.
Bul jaǵdai qoǵamda taǵy da rezonans týǵyzdy. Artynsha Almaty oblysynyń Politsiia departamenti mán-jaidy túsindirdi.
"Ýaqytsha ustaý izoliatorynan bir tutqynnyń týǵan kúnin atap ótýi beinelengen videonyń taralý faktisi boiynsha jan-jaqty tekserý júrgizilýde. Barlyq kináli tulǵalar, sonyń ishinde basshylyq ta, qatań jaýapkershilikke tartylady. Tergeý barysy erekshe baqylaýǵa alyndy. Osy quqyq buzýshylyqqa yqpal etken sebepter men jaǵdailardy joiý boiynsha sharalar qabyldandy", — dep málimdedi politsiia.
Keiin Sherzat Bolattyń isi boiynsha kúdiktilerden uialy telefon, Alisa qurylǵysy tárkilengen. Bul týraly jábirlenýshi taraptyń advokaty málimdedi.
Advokattar quqyq qorǵaý organdaryna suraý jibergen. Jelide taraǵan oqiǵa Eńbekshiqazaq aýdanyndaǵy ýaqytsha ustaý izoliatorynda bolǵan.
Advokat Erlan Adaevtyń sózinshe, bul jaǵdai boiynsha quzyrly organdardan tolyq aqparat suratqan.
"Eńbekshi qazaq aýdanyndaǵy laýazymdy tulǵalarǵa qatysty qyzmettik tekseris aiaqtaldy. Qorytyndy Almaty oblysysyń politsiia departamentine jiberildi. Iske qatysty laýazymdy tulǵalardyń bári de anyqtaldy. Olar tártiptik komissiia sheshimimen jazaǵa tartylady. Tergeý izoliatorynda qoldanylǵan zańsyz zattardyń bári – mobildi telefon, Iandeks-kolonka tárkilenip, qyzmettik tergeý matertaldaryna tirkeldi. Beinebaqylaý kameralarynyń jazbalary zertteldi", – degen ol.
Resmi derekke súiensek, beinejazbany burynǵy izoliator qyzmetkeri jeke telefonyna túsirgen kórinedi. Ol qyzmettik tártipti óreskel buzǵany úshin jumysynan bosatylyp, arnaiy ataǵynan aiyryldy. Sonymen qatar bul oqiǵaǵa bailanysty qylmystyq is qozǵaldy.
Ministrliktiń málimetinshe, 16 qyzmetker tártiptik jaýapkershilikke tartylyp, qyzmetinen qýyldy. Olardyń qatarynda izoliator bastyǵy da bar.
Eske salaiyq, 2024 jyly 4 qazanda Talǵarda 16 jastaǵy jasóspirim Sherzat Bolat qaza tapty. Araǵa biraz ýaqyt salyp Sherzattyń aǵvsy Nurqanat Ǵaiypbaev ta óli tabyldy.
