Búgin Sherzat Bolattyń ólimine aiyptaý jónindegi is boiynsha basty sot talqylaýy tikelei efirde qaita jalǵasty, dep habarlaidy Dalanews.kz.
Sot otyrysynyń onlain transliatsiiasyn Joǵarǵy sottyń YouTube-arnasynan kóre alasyzdar.
Eske salaiyq, byltyr Talǵarda jappai tóbeles bolyp, saldarynan 16 jastaǵy jasóspirim Sherzat Bolat kóz jumdy.
Kámeletke tolmaǵan balany óltirý deregi boiynsha Almaty oblysynyń Politsiia departamenti qylmystyq is qozǵady. Sondai-aq, olardyń úii órtenip ketti.
Kóp uzamai, iaǵni 9 jeltoqsanda marqum Sherzat Bolattyń aǵasy Nurǵanat Ǵaiypbaev ajal qushty. Politsiia departamenti aldyn ala derekter boiynsha ol sýitsid jasaǵanyn málimdedi. Oǵan dálel retinde politseiler Nurǵanattyń týysyna messendjer arqyly jazǵan hatyn jariia etti.
Al marqum Sherzattyń ákesi baýyry Nurǵanat Ǵaiypbaevty jer qoinyna tapsyrǵanan keiin buqaralyq aqparat quraldarymen kezdesýdi talap etip, kóshege shyqty. Alaida araǵa uzaq ýaqyt salmai Qarjaýbai Nurymovty politsiia qyzmetkerleri ustap áketti. Artynsha Sherzat Bolattyń ápkesi qamaýǵa alyndy. Keiin Qarjaýbai Nurymov 15 táýlikke ákimshilik qamaýǵa alyndy.
Aita keteiik, atalǵan is boiynsha barlyǵy 9 adam aiyptalýda:
– Abzal Shynasyl — QR Qylmystyq kodeksiniń 293-baby 3-bóligi («Buzaqylyq»), 99-baby 2-bóligi 4 jáne 5-tarmaqtary («Asa qatigezdikpen qasaqana kisi óltirý»), sondai-aq 24-baptyń 3-bóligi («Qylmysqa daiyndalý jáne oqtalý») boiynsha;
– Ravil Sakiev — 293-bap 3-bóligi jáne 99-bap 2-bóligi 7 jáne 9-tarmaqtary boiynsha («Buzaqylyq», «Asa qatigezdikpen qasaqana kisi óltirý»);
– Shyńǵys Belqojaev, Darhan Askentai, Nurqiias Iliiasov, Nurbol Toqtaýbaev, Didar Ǵaliahmet, Azamat Toqtaýbaev — 293-bap 3-bóligi boiynsha («Buzaqylyq»);
– Dýman Ysqaq — 434-bap («Qylmys týraly habarlamaý») boiynsha jaýapqa tartylýda.
Sot otyrysy ashyq formatta ótip jatyr. Protsestiń tikelei transliatsiiasy Joǵarǵy Sottyń resmi YouTube arnasynda júrgizilýde.
Málimetterge súiensek, sot aldyna kelgen aiyptalýshylardyń tórteýi buryn da qylmystyq jaýapkershilikke tartylǵan bolyp shyqty.
Atap aitqanda, Ravil Sakiev 2021 jyly 2 jyl 6 aiǵa bas bostandyǵynan aiyrylǵan, Shyńǵys Belqojaev 2015 jyly bas bostandyǵyn shekteý jazasyna kesilgen, Nurqiias Iliiasov – 2 jyl 6 ai merzimge bas bostandyǵyn shekteý jazasyn alǵan. Al Azamat Toqtaýbaev 2024 jyly 7 jylǵa sottalǵan. Aiyptalýshylardyń ekeýi — adam densaýlyǵyna qasaqana aýyr ziian keltirgeni úshin jaýapqa tartylǵan.
