Almatydaǵy Saiyn kóshesinde qoǵamdyq kólikke arnalǵan jańa arnaiy jolaq iske qosylǵan edi. Keiin bul jolaqqa jol qozǵalysy erejeleri saqtalýyn baqylap, zańbuzýshylyqtardy tirkeitin "Sergek" kameralary ornatyldy, dep habarlaidy dalanews.kz.
13 tamyzda saǵat 18:45 shamasynda Saiyn kóshesinde ekinshi dárejeli joldan negizgi jolǵa shyǵatyn tusta kólik keptelisi paida bolǵan. Joldaǵy jaǵdai áleýmettik jelide jariialanǵan videodan kórinedi.
Jeli qoldanýshylary kamera ornatylǵannan keiin kólik qozǵalysy qiyndaǵanyn aityp, avtobýs jolaǵyna qatysty pikir bildirdi. Keibir turǵyndar arnaiy jolaqty alyp tastaýdy usynsa, endi biri kameralar men jańa jol belgileri keptelisti kúsheitip jatqanyn jazdy.
"Almatydaǵy keptelisti áli birde-bir ákim sheshe alǵan joq", "Saiyn kóshesinde avtobýstar onsyz da jaqsy júretin", "Kólikter eki saǵattap kepteliste tursa, qaladaǵy aýa tazalyǵyn qalai jaqsartýǵa bolady?" degen pikirler de aityldy.
Turǵyndar oqý jyly bastalǵannan keiin, ásirese, 1 qyrkúiekten soń Saiyn kóshesindegi kólik qozǵalysy odan ári qiyndaýy múmkin dep alańdap otyr.
