Qazaqstannyń qarjy naryǵyna qatysýshylar dollar baǵamy men infliatsiia boiynsha boljamyn jaqsartyp, bazalyq mólsherlemeniń 16%-ǵa deiin tómendeýin kútedi, dep habarlaidy dalanews.kz.
Qazaqstan qarjygerleri qaýymdastyǵynyń Analitikalyq ortalyǵy qazan aiyndaǵy kásibi naryq qatysýshylary arasynda júrgizilgen saýalnamanyń nátijesin jariialady. Zertteýge bankterdiń, saqtandyrý jáne brokerlik uiymdardyń ókilderi, sondai-aq taldaý jáne qazynashylyq bólimderiniń mamandary qatysty.
Saýalnamaǵa qatysqan sarapshylardyń 85%-y Ulttyq banktiń 23 qazandaǵy otyrysynda bazalyq mólsherleme tómendeidi dep kútedi. Olardyń boljamynsha, mólsherleme 15,75–16% deńgeiine deiin túsýi múmkin.
Mólsherlemeniń tómendeýin kútetin sarapshylardyń 71%-y onyń 0,25 paiyzdyq tarmaqqa tómendep, 16%-ǵa deiin túsýin boljap otyr. Qalǵandary aqsha-nesie saiasatynyń odan da aitarlyqtai jumsarýy múmkin dep sanaidy.
Al 12 aidan keiin bazalyq mólsherleme 14,5% deńgeiinde bolady degen boljam jasaldy. Alaida onyń odan ári tómendeýine infliatsiialyq kútýlerdiń joǵary bolýy, biýdjettik yntalandyrý, tariftik reformalar jáne syrtqy baǵa faktorlary áser etýi múmkin.
Sarapshylardyń bir jylǵa arnalǵan infliatsiia boljamy da tómendedi. Qyrkúiektegi 10,4%-dan qazanda 9,7%-ǵa deiin qaita qaraldy. Bul kórsetkish qazirgi infliatsiia deńgeiin emes, aldaǵy 12 aidaǵy baǵanyń ósýine qatysty kútýdi bildiredi.
Dollar baǵamyna qatysty boljam da jaqsarǵan. Sarapshylar qarashanyń basynda AQSh valiýtasy 456,5 teńge bolady dep kútedi. Buǵan deiingi saýalnamada bul kórsetkish 474,2 teńge bolǵan.
Bir jyldyq boljam boiynsha da dollar baǵamy tómendetildi. Qyrkúiekte sarapshylar 511,6 teńge dep boljasa, qazanda 502,6 teńge deńgeiin kútetinin aitty. Degenmen bul kórsetkish 500 teńgeden joǵary bolyp qalyp otyr.
Naryq qatysýshylary teńgeni qoldaityn faktorlardyń qatarynda teńgedegi aktivterdiń joǵary naqty kiristiligin, Qazaqstannyń táýelsiz kredittik reitingisiniń kóterilýin, Ulttyq banktiń valiýtalyq operatsiialary aiasyndaǵy shetel valiýtasyn satýdy jáne beirezidentterdiń memlekettik baǵaly qaǵazdarǵa qarajatynyń kelýin ataǵan.
Sonymen qatar sarapshylar aldaǵy bir jylda Brent markaly munai baǵasy boiynsha boljamyn 83,7 dollardan 79 dollarǵa deiin tómendetti. Bul munai usynysynyń artýy múmkindigimen bailanysty.
Munai baǵasyna qatysty boljam tómendegenimen, Qazaqstan ekonomikasynyń ósýine qatysty kútýler ózgergen joq. Sarapshylar 2026 jyly ekonomikalyq ósim 4,4% bolady dep otyr.
Olardyń baǵalaýynsha, ekonomikalyq ósimdi qarjylyq jaǵdaidyń birtindep jumsarýy, biýdjet shyǵystary jáne iri investitsiialyq jobalar qoldaýy múmkin.
Saýalnama nátijeleri qarjy naryǵynyń táýelsiz kásibi qatysýshylarynyń pikirin kórsetedi. Bul Ulttyq banktiń resmi boljamy nemese saýalnamaǵa qatysqan uiymdardyń resmi pozitsiiasy emes.
