"Shańyraq" qoǵamdyq birlestiginiń basshysy Almasbek Sadyrbaıǵa qatysty qylmystyq is ne sebepti Qarjylyq monıtorıń agenttiginen arnaıy prokýrorlar qaraýyna ótkenin Bas prokýratýra túsindirdi, dep habarlaıdy Dalanews.kz Kazinform agenttigine silteme jasap.

"Qazirgi tańda A. Sadyrbaı QK-niń 190-babynyń 4-bóliginiń 2-tarmaǵymen kózdelgen qylmystyq quqyq buzýshylyq jasady degen kúdikpen Almaty jáne Jetisý oblystary boıynsha Qylmystyq-atqarý júıesi departamentine qarasty tergeý ızolátorynda kúzetpen ustaý túrindegi bultartpaý sharasymen qamaýǵa alynǵan", - dep jazylǵan jaýapta.

Aıta ketý kerek, bul tarmaq osy baptyń alǵashqy 3 bóliginde kórsetilgen qylmystardy asa iri mólsherde jasaǵan jaǵdaıda qoldanylady. Onyń ishinde memlekettik fýnksıalardy oryndaýǵa ýákilettik berilgen adamǵa teńestirilgen tulǵa retinde adamdar tobymen sóz baılasa otyryp, óziniń qyzmet babyn paıdalana otyryp, aqparattyq júıeni paıdalanýshyny aldaý nemese senimin teris paıdalaný arqyly memlekettik satyp alý salasynda eki nemese odan da kóp adamǵa qatysty birneshe ret jasalǵan alaıaqtyq jolmen bótenniń múlkin jymqyrý nemese bóten múlikke quqyqty ıemdený áreketteri bar. Kúdiktini sot kináli dep tanysa, múlki tárkilenip, 10 jylǵa deıin bas bostandyǵynan, ómir boıyna belgili bir qyzmettermen aınalysý quqyǵynan aıyrylýy múmkin.

Eske salaıyq, byltyr 6 qarashada Sadyrbaı ózi basqaratyn adamdar toby Balqash, Eńbekshiqazaq, Kegen, Raıymbek jáne Uıǵyr aýdandarynda jalǵan aýyl sharýashylyǵy kooperatıvterin qurdy degen kúdikke ilingen.

Negizgi maqsat - usaq maldyń analyq basyn uryqtandyrýǵa sýbsıdıalardy zańsyz alý jáne jemshóp shyǵyndaryn óteý.

"Bul úshin zańnamaǵa qaıshy aýylsharýashylyq jerleri joq sharýa qojalyqtary tartyldy. Budan ári jalǵan kadastrlyq nómirlerdi kórsete otyryp, dáıeksiz málimetterdi qamtıtyn sýbsıdıalar alýǵa ótinimder qashyqtan berildi. Bul rette aýyl sharýashylyǵy kooperatıvteri basshylaryn habardar etpeı, olardyń ESQ-sy paıdalanyldy.

Osylaısha 1,2 mlrd teńgeden astam qarajat urlanǵan", - dep habarlady buǵan deıin QMA.

Keıin Almasbek Sadyrbaev ustaldy. Onyń sybaılasy tergeý sotynyń sanksıasymen úı qamaqqa alyndy.

Al ustalǵanynan eki apta buryn Almasbek Sadyrbaev Arman Abdollaǵa suhbat bergen. Sadyrbaev óz suhbatynda eldegi nan baǵasynyń qymbat ekenin aıtyp, onyń shyn baǵasy 50 teńge bolýy keregin de aıtty. 

Sondaı-aq, Qazaqstanda qashan asharshylyq bolatynyn da boljaǵan.