Qazaqstandyq jýrnalist Symbat Erkinbek Reseige jumys isteýge barǵan inisiniń Ýkrainadaǵy soǵys aimaǵyna jiberilgeli jatqanyn málimdedi. Ol áleýmettik jeli arqyly quzyrly organdardan kómek surady, dep habarlaidy dalanews.kz.
Jýrnalistiń aitýynsha, 2006 jyly týǵan inisi Ainabek jýyrda ǵana Ulttyq ulan qataryndaǵy áskeri qyzmetin aiaqtap kelgen. Keiin oǵan Reseide kúzetshi bolyp jumys isteý usynylǵan. Alaida shetelge barǵan soń, túrli qysym arqyly qujattarǵa qol qoiǵyzyp, soǵysqa attandyrýǵa áreket jasalǵan.
“Inim búgin habarlasyp, qazir Ýkrainanyń Lýgansk mańynda ekenin aitty. “Eki-úsh kúnniń ishinde alyp ketpeseńizder, soǵysqa jóneltý bastalyp ketti” dep kómek surap otyr”, – dep jazdy Symbat Erkinbek.
Onyń sózinshe, mundai jaǵdaiǵa Ainabek qana emes, Qazaqstannan barǵan basqa da jas jigitter tap bolǵan. Inisi buǵan deiin birge áskeri qyzmet atqarǵan bes-alty jigitti de sol jerden kezdestirgenin aitqan. Qazir onyń janynda kómek kútip otyrǵan on shaqty qazaqstandyq bar kórinedi.
Jýrnalist bul másele boiynsha memlekettik organdarǵa habarlasyp, resmi ótinishter joldaǵanyn jetkizdi. Ol istiń memleketaralyq deńgeide qaralýy qajet dep esepteidi.
“Memleket aralaspasa, bul máseleni sheshý qiyn siiaqty. Aqparattyń quzyrly organdarǵa jetýine jýrnalisterdiń, qoǵam belsendileri men barsha qazaqstandyqtyń kómegi kerek”, – dedi ol.
Ázirge Qazaqstannyń quzyrly organdary atalǵan jaǵdaiǵa qatysty resmi málimdeme jasaǵan joq. Jariialanǵan aqparattaǵy derekter táýelsiz túrde rastalmaǵan.
