Reseidiń Qarjy ministrligi dron shabýylynan zardap shekken Wildberries kásipkerlerine qoldaý kórsetýdi usyndy. Bul týraly vedomstvonyń baspasóz qyzmeti málimdedi, dep habarlaidy dalanews.kz.
Usynysqa sáikes, shyǵyny jyldyq tabysynyń 5 paiyzynan asqan kásipkerler keibir salyqtar men saqtandyrý jarnalaryn bir jyldan keiin tólei alady. Bul jeńildik zańdy tulǵalar men jeke kásipkerlerge beriledi.
Atap aitqanda, 2026 jylǵy tamyzdan 2027 jylǵy shildege deiin tólenýge tiis qosylǵan qun salyǵy, tabys salyǵy, jeńildetilgen salyq júiesi boiynsha tólemder men saqtandyrý jarnalary 12 aiǵa keiinge shegeriledi. Osy merzim aiaqtalǵan soń kásipkerler jinalǵan qaryzyn taǵy bir jyl boiy teń bóliktermen ótei alady.
Wildberries kompaniiasyna da salyqtyq jeńildik qarastyrylyp otyr. Kompaniianyń 2026 jylǵy shildeden 2027 jylǵy maýsymǵa deiingi salyqtary men saqtandyrý jarnalaryn tóleý merzimi 2027 jylǵy 28 shildege deiin uzartylmaq. Keiin bul bereshekti bir jyl ishinde bólip tóleýge múmkindik beriledi.
Sondai-aq 2026 jyldyń sońyna deiin zardap shekken kásipkerler men Wildberries-tiń bas kompaniiasy sanalatyn "RVB" tobyna salyqtyq tekserý júrgizilmeidi. Bereshekti óndirip alýǵa qatysty merzimder de alty aiǵa uzartylady.
Reseidiń qarjy ministri Anton Silýanov bul sharalar kásipkerlerge túsetin qarjylyq jáne ákimshilik júktemeni azaityp, jumysyn qaita qalpyna keltirýge kómektesetinin aitty.
Wildberries negizin qalaýshy Tatiana Kim salyqty keiin tóleý múmkindigi kompaniia men kásipkerler úshin mańyzdy qoldaý bolatynyn atap ótti.
"Salyq tóleý merzimin keiinge shegerý tutynýshylarǵa kórsetiletin qyzmet sapasyn saqtaýǵa jáne kásipkerlerdiń jumysyn jalǵastyrýǵa múmkindik beredi. Sondai-aq platformalyq ekonomikanyń jańa jaǵdailarǵa jyldam beiimdelýine kómektesedi", - dedi ol.
