Resei áskeri 7 qazanǵa qaraǵan túni Ýkrainaǵa zymyrandar men drondarmen jappai soqqy jasap, keminde 32 adam qaza tapty, 100-den astam adam jaralandy, dep habarlaidy dalanews.kz.
Ýkrainanyń Chernigov oblysyndaǵy Prilýki qalasynda reseilik zymyran bes qabatty turǵyn úige tiip, ǵimarattyń bir bóligi qiraǵan. Qutqarý qyzmetiniń málimetinshe, qalada qaza tapqandar sany 22 adamǵa jetken, olardyń arasynda balalar bar.
Kievte de turǵyn úige jasalǵan soqqy men drondardyń qulaýynan tórt adam qaza tapqan. Budan bólek, zardap shekkender Kirovograd, Dnepropetrovsk, Poltava jáne Harkov oblystarynda tirkeldi.
Resei Qorǵanys ministrligi soqqylardy rastady. Vedomstvo shabýyldyń Ýkrainadaǵy áskeri-ónerkásip nysandaryna, onyń ishinde Kievtegi Fire Point kompaniiasynyń qanatty zymyrandar men uzaq qashyqtyqqa ushatyn drondar óndiretin jáne saqtaityn nysandaryna baǵyttalǵanyn málimdedi.
Ýkraina prezidenti Vladimir Zelenskii shabýyldy aiyptap, Reseidiń ballistikalyq zymyrandary el úshin negizgi qaýip bolyp otyrǵanyn aitty. Onyń málimetinshe, shabýyl kezinde Resei shamamen 70 zymyran jáne ondaǵan «Shahed» dronyn ushyrǵan.
Sonymen qatar, Eýropalyq odaq elderi Reseige qarsy jańa sanktsiialar paketin kelisip, 1646 jeke tulǵa men uiymdy sanktsiialyq tizimge engizýdi maquldady. Olardyń basym bóligi Reseidiń áskeri-ónerkásiptik keshenimen, sonyń ishinde «Iskander-M» ballistikalyq zymyrandaryn óndirý tizbegimen bailanysty. Sanktsiialar dúisenbi kúni EO syrtqy ister ministrleriniń otyrysynda resmi bekitilýi tiis.
