Reseidiń memlekettik VEB.RF damý korporatsiiasy bas ekonomist Andrei Klepachty qyzmetinen bosatty. Bul onyń Resei ekonomikasynyń jaǵdaiy men Ýkrainadaǵy soǵystyń elge túsirip otyrǵan shyǵyny týraly syni pikirlerinen keiin bolǵan, dep habarlaidy dalanews.kz.
Klepach VEB.RF-te 2014 jyldan beri bas ekonomist qyzmetin atqarǵan. Onyń qyzmetten ketkenin VEB.RF ókili rastaǵan, alaida jumystan bosatylý sebebin túsindirmegen. Klepachtyń ózi de qyzmetinen ketkenin rastady.
Buǵan deiin ekonomist mamyr aiynda Máskeý birjasynyń Nikitskii klýbynda ótken kezdesýde Reseidiń ekonomikalyq jáne tehnologiialyq turǵyda AQSh pen Qytaidan, al keibir baǵyttar boiynsha Ýkrainadan da artta qalyp jatqanyn aitqan.
Klepach Resei uzaqqa sozylatyn ekonomikalyq «tozý soǵysynda» jeńiske jete almaitynyn boljap, elde áleýmettik daǵdarys qaýpi bar ekenin eskertken. Onyń pikirinshe, Ýkraina ekonomikasynyń jaqyn arada kúireidi degen boljamdar negizsiz, al soǵys shyǵyndarynyń ósýi Reseige túsetin qysymdy kúsheitip otyr.
Ekonomist sondai-aq Resei ekonomikasynyń sanktsiialarǵa belgili bir deńgeide tótep bergenin moiyndaǵanymen, memlekettik basqarýdaǵy qatelikter men tiimsiz sheshimder turaqsyzdyqty kúsheitýi múmkin ekenin aitqan.
Reuters agenttiginiń málimetinshe, Klepachtyń jumystan bosatylýyna onyń osy syni pikirleri sebep bolǵanyn jaǵdaidan habardar eki derekkóz rastaǵan. Alaida VEB.RF bul aqparatty resmi túrde rastaǵan joq.
Klepach Reseidiń ekonomikalyq damý ministriniń orynbasary qyzmetin de atqarǵan. VEB.RF onyń ornyna jańa bas ekonomist kandidatýrasy tańdalǵanyn habarlady.
