Ǵylym jáne joǵary bilim ministrligi memlekettik ýniversitet rektorlarynyń qyzmet etý merzimin alty jylmen shektemek. Bul týraly ministr Saiasat Nurbek málimdedi, dep habarlaidy dalanews.kz.
Pikirmedia.kz jýrnalisi mektep direktorlaryna rotatsiia tártibi qoldanylatynyn atap ótip, nelikten joǵary oqý oryndarynyń rektorlaryna osyndai merzimdik shekteý qoiylmaitynyn surady. Ol mysal retinde L.N. Gýmilev atyndaǵy Eýraziia ulttyq ýniversitetin 2011 jyldan beri basqaryp kele jatqan Erlan Sydyqovty atady.
Saiasat Nurbektiń aitýynsha, rektorlarmen standartty túrde úsh jylǵa kelisimshart jasalady. Ministrlik ony taǵy bir merzimge uzartýǵa quqyly. Odan keiin basshylyq qyzmetke konkýrs jariialanady.
“Negizinde, standartty kelisimsharttyń merzimi – úsh jyl. Ministrlik ony ekinshi merzimge uzartýǵa quqyly. Odan keiin konkýrs ótkiziledi”, - dedi ministr.
Alaida qoldanystaǵy zańnama boiynsha qyzmettegi rektordyń konkýrsqa qaita qatysýyna shekteý qoiý múmkin emes. Sondyqtan keibir ýniversitet basshylary konkýrstan qaita ótip, qyzmetin birneshe márte jalǵastyryp keledi.
“Qazirgi rektorlardyń konkýrsqa qatysýyn shekteýge bizdiń múmkindigimiz joq. Zań boiynsha kez kelgen azamat konkýrsqa qatysa alady. Ókinishke qarai, kei jaǵdailarda rektorlardyń qyzmet merzimi konkýrs arqyly uzara beredi”, - dep túsindirdi Saiasat Nurbek.
Ministrlik endi rektorlardyń bir ýniversitetti basqarý ýaqytyn eki merzimmen shekteý týraly sheshim qabyldap jatyr. Vedomstvo basshysy alty jyl joǵary oqý ornyn damytýǵa jáne júieli jumys júrgizýge jetkilikti merzim dep esepteitinin aitty.
“Biz qazir eki merzimmen shekteý týraly sheshim qabyldap jatyrmyz. Alty jyl ishinde ýniversitetti aiaqqa turǵyzýǵa múmkindik bolady. Erlan Sydyqovtyń kelisimsharty kelesi jyldyń basynda aiaqtalady, sodan keiin aýystyramyz”, - dedi ministr.
Saiasat Nurbek uzaq ýaqyt qyzmet atqarǵan rektorlarǵa da toqtaldy. Onyń aitýynsha, Sársen Amanjolov atyndaǵy Shyǵys Qazaqstan ýniversitetin shamamen segiz jyl basqarǵan Muhtar Tólegen jýyrda qyzmetinen aýystyrylǵan.
Jalpy, Qazaqstanda rektorlardyń joǵary oqý ornyn basqarý merzimi orta eseppen tórt-bes jyldy quraidy. Qazir birqatar basshynyń ekinshi qyzmet merzimi aiaqtalyp keledi.
“Ekinshi merzimderi aiaqtalǵannan keiin qabyldanǵan ustanymǵa sáikes rektorlardy aýystyramyz nemese jańa konkýrs jariialaimyz”, - dedi vedomstvo basshysy.
Jýrnalist ministrden Erlan Sydyqovty qyzmetinen aýystyrýǵa zańnamalyq múmkindik jetpei otyr ma dep naqtylady. Saiasat Nurbek bul pikirmen kelispei, másele ministrliktiń ókiletine emes, zańda konkýrsqa qaita qatysýǵa tyiym salatyn normanyń bolmaýyna bailanysty ekenin jetkizdi.
“Joq, másele onda emes. Qazirgi zańnamada konkýrsqa qatysýdy shekteitin norma joq. Onyń jaǵymsyz saldary bar. Bir qyzmette uzaq jyl otyrǵan rektorlarymyz bar ekenin moiyndaýymyz kerek”, - dedi ministr.
