AQSh-ta turatyn qoǵam belsendisi, saiasatker Ǵalymjan Jaqiianovtyń jary Qarlyǵash Jaqiianova el arasynda taraǵan Sara Alpysqyzy týraly pikirlerge bailanysty óz esteligin jariialap, kópshilikpen bólisti, dep habarlaidy Dalanews.kz.
Ol 2003 jyly saiasi kózqarasy úshin sottalǵan jubaiy Ǵalymjanmen kezdesýge Qushmuryn túrmesine jol tartqan sátti eske aldy.
"Ondai kezdesýge úsh aida bir ret qana ruqsat beriletin. Jol ústinde maǵan bireý sóileskisi keletinin aityp, telefon soqty. Bul — Sara Alpysqyzy edi. Sol sátte kóp adam bizden teris ainalǵan edi, al onyń maǵan habarlasýy — kútpegen ári úlken demeý boldy", — dep jazdy Jaqiianova.
Osy tusta kútpegen jerden oǵan Sara Alpysqyzy ózi qońyraý shalyp:
"Myqty bol, janym. Sen myqtysyń. Men árdaiym seniń janyńdamyn" dep demeý bildirgen.
"Bul qysqa ǵana áńgime edi, biraq maǵan ǵasyrdai áser etti. Bir jyldan astam ýaqyt boiy tumshalanǵan jan-dúniem alǵash ret jaryq sáýle kórgendei serpilip qaldy", — deidi ol.
Keiinirek Sara Alpysqyzy Qarlyǵash Jaqiianovany týǵan ólkesi — Belýha taýyna birge barýǵa shaqyrǵan. Bul saparǵa tek ózine eń jaqyn jandardy ertpek bolǵanyn jetkizgen. Qarlyǵash bul usynysty qabyl alyp, Óskemenge, odan Belýhaǵa jol tartqan. Sapar barysynda olardy jergilikti bilik ókilderi qarsy alǵanymen, keibireýleri Jaqiianovtyń jubaiyn tanymai, syrt ainalǵandai bolǵan.
"Biraq sol jerde “Sonar” ansambliniń jetekshisi Ǵibrat meni tanyp, kelip qushaqtap, keshki kontsertte júrekjardy alǵysyn aityp, “Ainalaiyn” ánin arnady. Oǵan jaýap retinde Sara Alpysqyzy: “Ómir — kúrdeli, biraq keremet. Qandai jaǵdai bolsa da, adam bolyp qalýymyz kerek” dep, ózi “Jan dosym” ánin oryndap berdi", — dep eske alady Qarlyǵash Jaqiianova.
Ol Sara Alpysqyzyn adamgershiligi biik, ary taza, júregi meiirimge toly tulǵa retinde sipattap, qiyn sátte janynan tabylǵany úshin alǵys bildirdi. Sonymen qatar ony túsinde kórgenin aityp, bul oqiǵany búgingi qoǵamǵa oi salý úshin jazǵanyn atap ótti.
